Iberdrola segue obtendo grandes beneficios no medio da polémica polo aumento do prezo da electricidade. Segundo informou a Comisión Nacional do Mercado de Valores (CNMV), de xaneiro a setembro de 2021 gañou 2.408 millóns de euros, só un 10% menos con respecto ao mesmo período do ano anterior. Porén, se se exclúe o efecto dos elevados prezos da enerxía, os novos impostos e as partidas extraordinarias máis baixas, o seu beneficio neto axustado incrementouse un 5,2%, ata os 2.688 millóns de euros.
Iberdrola é o primeiro operador hidráulico da Galiza. A multinacional, con sede en Bilbo, conta cunha capacidade de xeración de 1.558 megawatts e 13 encoros, téndolle renovado os Gobernos do Estado a licenza para continuar explotando diversas presas na Galiza máis alá do prazo fixado na concesión inicial. A empresa dirixida por Ignacio Sánchez Galán presenta como accionistas de referencia ao fondo soberano de Catar con 9,72%, a Kutxabank con 3,60%, a Norges Bank con 3,17% e ao fondo de investimentos estadounidense Blackroc.
Iberdrola, ademais, é impulsora na Galiza de boa parte dos proxectos eólicos, como o que procuraba instalar aeroxeneradores mariños en comarcas costeiras do norte do país, ou os que ameazan a terceira fortificación máis grande da Galiza
Nos nove primeiros meses do ano, a compañía acadou un beneficio bruto de explotación (Ebitda) de 8.165 millóns de euros (+10,7%), impulsado por Estados Unidos e Brasil. O 87% do total procedía de redes e renovábeis. Neste parámetro destaca, segundo Iberdrola, o impacto negativo do aumento dos prezos da enerxía no estado español e Reino Unido, así como as medidas normativas no Estado.
Neste contexto, a compañía afirma que rexistrou un "forte" comportamento da súa actividade nos nove primeiros meses de 2021, cuns investimentos que aumentaron un 6%, até os 7.036 millóns de euros, destinando o 77% aos mercados internacionais.
O 90% do total destes investimentos destináronse ao desenvolvemento de novos proxectos renovábeis, almacenamento e redes intelixentes. Os investimentos en redes aumentaron un 27%, ata os 3.185 millóns de euros.
Red Eléctrica, tamén
Outra compañía eléctrica que conseguiu abundantes beneficios é o Grupo Red Eléctrica, que obtivo un beneficio neto de 550,8 millóns de euros nos nove primeiros meses do ano, o que supón un incremento do 8,6% con respecto ao mesmo período do ano anterior.
