O comercio galego acepta "de mala gana" as medidas incluídas no Plan de aforro enerxético do Goberno estatal, como apagar os escaparates ás 22 horas ou manter fechada a porta, que son obrigatorias desde esta cuarta feira.
"Están a levarse a cabo porque existe por parte de todos vontade para poder colaborar porque nos decatamos de que é necesario", apunta o presidente da Federación Galega de Comercio, José María Seijas.
Porén, sinala que o sector "xa está afeito por parte do Goberno" a "sacar leis e decretos inconcretos que non acaban de ter un desenvolvemento que se poida comprender facilmente".
"Isto está a trastocarnos e dando moitos problemas e mareos. Parece que sempre o comercio é quen paga o pato dos erros que se van cometendo", protesta.
Seijas incide en que ditas medidas "maiormente vanse cumprindo", para a continuación deixar caer que "a ver que comerciante non procura gastar o menos posíbel en enerxía dado o prezo que ten". Con todo, asegura que son unhas solucións "que non van levar ao fin que pretenden".
Finalmente, o presidente da Federación Galega de Comercio suxire que será preciso "sentar a negociar e buscar solucións concretas co consenso de todas as partes e resolvelo".
A maior parte dos escaparates na cidade de Lugo permanecen apagados durante a noite, aínda que hai máis de un que saltou esta obriga e mantén a iluminación.