A Audiencia Nacional acordou a extradición a México do ex director xeral da petroleira Pemex Emilio Lozoya para ser xulgado en dúas causas por delitos que no seu país constituirían asociación ilícita, suborno e operacións con recurso de procedencia ilícita e que na lexislación española corresponden a asociación ilícita, suborno e branqueo de capitais.
Nun auto, os maxistrados da Sección Segunda da Sala do Penal consideran, tras examinar o procedemento, que se cumpren todos os requisitos establecidos na lexislación para proceder á entrega e lembran que Lozoya -impulsor tamén da compra do estaleiro vigués Barreiras por parte da petroleira mexicana- presentou un escrito o pasado 29 de xuño no que aceptou ser extraditado ao seu país e renunciou ao principio de especialidade (a prohibición de ser perseguido por feitos distintos dos que motivaron a solicitude de extradición).
Estaleiro Barreras
En setembro de 2012, Pemex e a Xunta anunciaban a firma dos contratos para a construción de dúas floteles (un en Barreras e outro en Navantia-Ferrol) e, algo máis dun ano despois, a proposta de Emilio Lozoya, o Consello de Administración de PMI (filial da petroleira mexicana) aprobou a compra do 51% das accións do estaleiro vigués por 5,1 millóns de euros.
Esta compra, apadriñada polo presidente galego, Alberto Núñez Feixoo (en cuxa axenda pública figuraron encontros con Lozoya en 2013 e 2014), escenificouse en decembro de 2013, nunha visita de mandatarios da empresa mexicana a Vigo. Nesa visita, anunciáronse varios contratos máis, que nunca chegaron a facerse realidade (un atuneiro, tres 'buques-tanque' e outras tres unidades que tampouco se concretaron).
