A campioa do mundo de fútbol coa selección española Tere Abelleira dixo esta sexta feira que "este é un bo momento" para marcar un "punto de inflexión" para que "ningún éxito das mulleres futbolistas e deportistas sexa manchado por ningún tipo de comportamento".
Abelleira fixo esta alusión indirecta á polémica xerada polo bico non consentido do presidente da Real Federación Española de Fútbol (RFEF), Luis Rubiales, á futbolista Jenni Hermoso, no transcurso da homenaxe brindada pola Deputación de Pontevedra na Cidade Infantil Príncipe Felipe.
Posteriormente, nas súas redes sociais, a centrocampista pontevedresa mostrou o seu apoio a Jenni Hermoso: "Intolerábel! Estamos contigo! @JenniHermoso", publicou no seu perfil de X.
Intolerable.
— Teresa Abelleira (@teresabelleira) August 25, 2023
¡ Estamos contigo ! @Jennihermoso
Neste acto participaron activamente xogadoras de fútbol dos diferentes equipos femininos galegos así como un grupo de mozos do Príncipe Felipe ás que a campioa dixo estar "segura de que dentro dalgúns anos" será ela a que "virá recibir a algunha de vós cunha medalla no peito".
Abelleira reivindicou o esforzo de moitas mulleres futbolistas "que levan camiñando desde hai moitos anos atrás sen recursos, cando lles puñan moitas barreiras", polo que o éxito deportivo do combinado español tamén é seu.
"Eu tíveno moito máis fácil do que o tiveron elas", díxolles ás xogadoras que a estaban escoitando e ás que desexou que o teñan "aínda máis fácil". "E que crezades con soños aínda máis grandes", engadiu.
Do mesmo xeito, a futbolista pontevedresa insistiu en que "é un orgullo e un privilexio formar parte deste cambio".