O xurado do VII concurso Novos Valores 2023 escolleu como banda gañadora ao grupo de indie pop coruñés, Leria. As súas integrantes, Mayra, Helena, Andrea e Itziar, serán as encargadas de abrir o Festigal o vindeiro 24 de xullo.
As “letras coidadas e creativas e as melodías pegadizas” foron os principais argumentos do xurado para a elección deste grupo de mulleres mozas que, malia levar pouco tempo nos escenarios, demostra unha gran complicidade.
“É unha banda con potencial e con proxección á que se lle augura un futuro de suceso no panorama pop da música galega”, valorou o xurado.
Leria naceu en 2021 da man de Mayra, vocalista e guitarrista, e Helena, batería e corista. Deron os seus primeiros pasos nas rúas da Coruña e, pouco tempo despois, uníronse á banda Itzi como baixista e Andrea como teclista.
Desde o nacemento, actuaron xa en numerosas salas coruñesas, entre elas a Mardi Gras.
Forza creativa no país
O xurado do concurso Novos Valores destacou a alta calidade e diversidade das propostas presentadas a esta VII edición, que contou con 13 bandas participantes chegadas de tódolos puntos de Galiza e con estilos moi diveros.
“Unha mostra da forza creativa das artistas que fan música en galego sen complexos”, aseguran dende o xurado, que este ano estivo composto polos músicos Alberto Busto, Anxo de Xermar e Xavier Castro; por Andrea Villa do ámbito da comunicación e da industria audiovisual; por Marta Gómez e Alberto García como membros de Galiza Nova, e por Lucía Veciño da Fundación Galiza Sempre.
