A actriz e pintora galega Rosalía Dans faleceu aos 68 anos, segundo informa o Concello de Curtis esta segunda feira. Filla da artista curtiense María Antonia Dans, Rosalía deu o salto á popularidade co seu papel de Rosario en Os gozos e as sombras (1982), serie de TVE.
Así se converteu nun rostro popular na pequena pantalla nos anos oitenta en series como Aneis de ouro (1983), Goya (1985), As aventuras de Pepe Carvalho (1986) ou Lorca, morte dun poeta (1987). Na longametraxe, destaca o seu papel en Amence, que non é pouco (1989), de José Luis Cuerda.
Nun comunicado, o Concello de Curtis mostra as súas condolencias polo falecemento dunha unha muller que "sempre mostrou un constante interese, dedicación e compromiso no benestar do pobo e os curtienses". Apartada da interpretación desde comezos dos anos noventa, dedicouse á pintura. A súa primeira exposición data de 1986.
Precisamente, a pasada semana Curtis inaugurou a Casa-museo de María Antonia Dans, co agradecemento á súa filla, Rosalía Dans, pola súa colaboración para a compra da casa e parcela para facer realidade este proxecto, o cal honrará a figura da súa nai e "servirá de galería a outros artistas", segundo explicaba a propia Rosalía nunha carta.
