Sabores refrescantes e apetitosos para gozar do verán

—Ensalada campeira Un clásico do verán, para levar á praia ou comer na casa. Elaboración: En primeiro lugar botamos auga nun cazo grande cun chisco de sal e cocemos os ovos durante 10 minutos e as patacas até que o picalas cun garfo estean brandas. Retiramos do lume, pelámolos e cortámolos en anacos non moi pequenos. Mentres arrefrían, cortamos a cebola en brunoise e os pementos en cadrados. Cortamos tamén os tomates en cubos e as olivas pola metade. Finalmente, mesturamos todos os ingredientes nunha ensaladeira e regamos ao gusto con aceite de oliva e vinagre. Servimos ben fresquiña. —Berenxenas recheas As berenxenas recheas de carne son unha fusión perfecta, onde o sabor da carne se mestura coa berenxena creando bocados suculentos. Elaboración: Comezamos lavando as berenxenas e cortándoas pola metade cun corte lonxitudinal. A continuación facemos cortes na carne da berenxena formando cadradiños e con coidado de non romper a pel. Metémolas no forno a 180º durante 30 minutos cun chisco de sal e aceite por enriba. Pasado este tempo sacámolas do forno, cunha culler retiramos a carne e reservámola. Despois de cociñar as berenxenas, cortamos a cebola, o allo e o pemento en brunoise. Imos comezar por rustrir a cebola a lume baixo cun chisco de sal até que estea transparente e logo engadimos o pemento e o allo. Agregamos tamén a carne picada e dourámola un chisco, pasados uns minutos regamos co vaso de viño e deixamos evaporar o alcohol. Despois diso incorporamos a carne da berenxena e o tomate frito e deixamos cociñar a fogo lento uns 15 minutos, remexendo de cando en vez. Cando teñamos a carne cociñada rectificamos de sal e cunha culler enchemos as berenxenas coa mestura que preparamos. Para rematar cubrímolas con bechamel e con queixo relado e metémolas outros 10 minutos no forno a 180º. Antes de sacalas do forno gratinamos até que se douren un pouco por enriba e servimos quentiñas. —Torta de framboesa Unha torta ben vistosa e fresca para aproveitar durante todo o verán. Elaboración: Comezamos facendo a crema pasteleira. Para iso botamos a metade do leite nun cazo coa ramiña de canela e agardamos até que ferva a fogo lento, logo retiramos do lume e deixamos infusionar uns minutos. Na outra metade do leite imos botando a maicena pouco a pouco mentres batemos para evitar gromos. A continuación, noutro cunco á parte, batemos os ovos co azucre e posteriormente engadímoslle o leite frío coa maicena. Para rematar a crema pasteleira, coamos o leite quente e botamos a metade na mestura dos ovos, remexemos e botamos o resto. Colocamos toda a mestura no mesmo cazo a fogo medio e remexemos constantemente até que espese a crema. Retiramos do lume e reservamos. Para a base da torta colocamos a lámina de masa quebrada nunha forma desmoldábel e deixámola no forno a 180º durante uns 25 minutos. Para rematar, estendemos a crema pasteleira sobre a base e colocamos as framboesas sobre a crema formando círculos concéntricos. Servimos ben fresquiña.