Delicias estivais: Tomates, cordeiro e pexegos

—Salmorejo Un prato típico da cociña andaluza, excelente para os aperitivos ou ceas do verán. Elaboración: Lavamos os tomates, pelámolos, cortámolos en anacos e botámolos no vaso dun batedor. Triturámolos cun batedor eléctrico. A continuación, engadimos o pan en anacos e deixámolo 10 ou 15 minutos para que abrande. Pelamos o allo, quitámoslle o centro e engadímolo. Botámoslle un chorriño de auga, un chorro abundante de aceite de oliva, un chisco de sal e trituramos todo até que quede unha mestura homoxénea. Se queremos que quede máis claro, engadimos outro pouco de auga e voltamos a bater. Servimos ben fresquiño, ben só, ben con tacos de xamón curado ou ovo cocido por enriba. —Año ao forno O año é puro sabor, amado por uns e odiado por outros. Con esta sinxela receita ao forno ides gozar de todo o seu gosto. Elaboración: Comezamos pelando os allos e botándoos nun morteiro, esmagámolos ben e engadímoslles unha culler de auga, unhas folliñas de romeu fresco e o zume de medio limón. Salgamos a pata polos dous lados e colocámola nunha fonte apta para o forno. Esparexemos ben por enriba a mestura de allo e metemos no forno, que previamente quentamos a 170º, durante 2 horas máis ou menos. Pasados 15 minutos imos engadir unha cullerada de auga ao fondo da fonte, mesturar ben cos zumes que foi soltando e regamos por enriba. Repetimos este proceso cada 15 ou 20 minutos. Pasadas as dúas horas botámoslle un ollo e se xa está douradiño por enriba e ben cociñado servimos. Podemos acompañar dunha ensalada ou con patacas asadas ao forno —Torta de pexego Con esta torta tan bonitiña e refrescante, poderemos adozar as sobremesas aproveitando as froitas de tempada. Elaboración: Comezamos preparando a masa. Batemos as xemas co azucre até ter unha mestura homoxénea. Engadimos a manteiga, o lévedo e a fariña pouco a pouco e imos mesturando cunha culler. Envolvemos a masa nun filme transparente e deixámola na neveira, 30 minutos como mínimo. Para cociñar a masa, estendémola cun rolete pero imos deixar o filme transparente por enriba para que non se pegue, xa que esta masa é bastante difícil de traballar. É moi importante tamén que estea ben fría para facilitar a súa manipulación. Colocamos o molde enriba, presionamos para cortar e retiramos a parte sobrante. Metemos no forno, que previamente quentamos a 180º, durante uns 15 minutos. Imos vendo cando comeza a dourarse por enriba e retiramos. Despois, pelamos e cortamos os pexegos, cociñámolos a fogo baixo nun cazo xunto co mel e a manteiga. Aos 15 minutos deberían estar xa brandiños, se non deixamos un anaco máis. Cando estean cociñados triturámolos cun batedor eléctrico. Mentres deixamos que arrefríe, imos bater a nata. Botámola nun cunco co azucre e o queixo e batemos cun batedor de globo eléctrico. Comezamos a baixa potencia e imos subindo pouco a pouco até que se debuxen sucos, o que nos indicará que xa está pronta. Cando estean frías a masa e o puré de pexego podemos montar a torta. Para iso estendemos o puré por enriba e a continuación cubrimos coa nata batida cunha manga pasteleira. Finalmente decoramos cuns anacos de pavía no centro.