luns 06/12/21

A patronal galega ábrese a cambiar "temas concretos" da reforma laboral "dentro do diálogo social"

Vieites rexeita unha intervención en Alcoa e pide unha factura eléctrica "eficiente" e "allea a flutuacións puntuais"
Manuel Vieites, presidente da Confederación de Empresarios de Galiza. (Foto: Carlos Castro / Europa Press)
Manuel Vieites, presidente da Confederación de Empresarios de Galiza. Foto: Carlos Castro / Europa Press.

O presidente da Confederación de Empresarios de Galiza (CEG), Juan Manuel Vieites, mostrouse aberto a cambiar "temas concretos" da reforma laboral do 2012, aínda que advertiu que calquera modificación debe abordarse "sempre dentro do diálogo social" entre sindicatos, Goberno e patronal. Nunha entrevista concedida este domingo á Radio Galega, Vieites recoñeceu que "pode ser que nalgún momento" o mercado laboral español estea "un pouco ríxido e descompensado", a pesar de que os datos de emprego xa están en niveis "previos á pandemia".

Mostrouse aberto a abordar cuestións como o desemprego xuvenil (na Galiza a taxa de actividade da mocidade é a máis baixa do Estado) e aspectos como o "traballo precario" e a "temporalidade".

Por isto mesmo, Vieites reivindicou que "non todo" o estipulado na lexislación laboral tras a reforma de 2012 "é malo", pero mostrouse aberto a abordar cuestións como o desemprego xuvenil (na Galiza a taxa de actividade da mocidade é a máis baixa do Estado) e aspectos como o "traballo precario" e a "temporalidade".

Iso si, o presidente da CEG recalcou que os cambios se deberán abordar "sempre dentro do diálogo social" para buscar puntos de encontro e "sempre por causas xustificadas".

Tras días nos que o sector de Unidas Podemos no Goberno denunciou "inxerencias" da vicepresidenta primeira, Nadia Calviño, nas conversas para a derrogación da reforma laboral anunciada pola vicepresidenta segunda, Yolanda Díaz, o líder da patronal galega pediu que o Executivo "ten que ser un". "Non se pode falar dunha maneira e doutra", criticou. Neste sentido, Vieites dixo que Díaz está "aliñada co sector de CC.OO.", sindicato ao que estivo vinculada "moito tempo", pero sinalou que "ese non é o camiño".

"Buscar o que una das partes ten en conta é o que fai que non se chegue a acordos e non se xere confianza mutua", engadiu o presidente da CEG, quen tamén avisou que se fai "un fraco favor" á negociación entre os axentes sociais. De feito, Vieites puxo como exemplo a subida do salario mínimo interprofesional (SMI) a 965 euros aprobada polo Goberno en setembro, sobre a cal afeou que se fixese "sen acordo no diálogo social" coa patronal.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Así mesmo, denunciou que o aumento non se fixese "de maneira gradual", xa que "a medio prazo podíase incrementar" o SMI "unha vez se implanten os fondos europeos e unha vez a recuperación estivese consolidada".

Vieites advertiu que a escalada do prezo da electricidade no Estado é un dos factores que poden lastrar o crecemento da economía na Galiza

Prezo eléctrico e reindustrialización

Precisamente, contrarrestar a subida dos prezos das materias primas e dos custos de produción asociados á enerxía, xunto a unha "reindustrialización" da Galiza, son algúns dos retos que ve a patronal galega de cara á recuperación poscovid.

Con todo, advertiu que a escalada do prezo da electricidade no Estado é un dos factores que poden lastrar o crecemento da economía na Galiza: "Afecta de maneira directa á rendibilidade e á viabilidade das empresas e, por tanto, á creación de riqueza e de postos de traballo".

Así, Vieites suxeriu que a factura eléctrica do Estado "debe someterse ao mesmo marco de xogo" que o resto de países da Unión Europea. De feito, apuntou que, desde 2007, o prezo se mantivo "por enriba" da media comunitaria e subiu "un 60 por cento até 2020" mentres o IPC o fixo "nun 15 por cento". Dado que isto "condiciona a competitividade internacional" das empresas autóctonas, o presidente da patronal galega reclamou unha factura "eficiente que non introduza elementos ou cargas alleas ao sistema eléctrico" e que estea "alleo a fluctuacións puntuais".

Ademais, avogou por "promover, facilitar e axilizar" a instalación de fontes de produción enerxética, sinaladamente renovábeis, pero "en ningún caso" ve con bos ollos a creación dunha compañía eléctrica pública. 

O líder da CEG rexeitou unha intervención temporal do Estado á planta de Alcoa San Cibrao, en Cervo (Lugo), tal e como reclaman tanto a Xunta como o comité de empresa. 

Rexeita a intervención en Alcoa

Do mesmo xeito, o líder da CEG rexeitou unha intervención temporal do Estado á planta de Alcoa San Cibrao, en Cervo (Lugo), tal e como reclaman tanto a Xunta como o comité de empresa. "Son partidario da liberdade de mercado e de cumprir coa lei de competencia. Os intervencionismos penso que non conducen a ningún fin", sinalou, para seguidamente apostar por un "consenso entre distintas administracións" que atope unha solución á crise desta factoría.

No caso de que este conflito non chegase a bo porto porque empresas con capital estranxeiro "consideran que a produtividade e a competitividade desde esta zona (A Mariña) non é fácil", Vieites considera que "hai que buscar alternativas" para reindustrializar.

É máis, avogou por que a industria alcance un peso do 20 por cento na economía galega. Para este fin, ve con bos ollos a chegada dos fondos 'Next Generation' e o marco financeiro plurianual da UE até 2027 para "atraer novos investimentos".

Aposta por manter a Ence en Lourizán

Na entrevista coa Radio Galega, o presidente da CEG tamén avalou a continuidade de Ence en Lourizán (Pontevedra) despois do informe do Consello Consultivo que sinala a posibilidade da pasteira se adhira ao Porto de Marín. E é que, segundo Vieites, se trata dunha factoría "fundamental" para o sector da madeira, á parte de que Galiza "non está moi sobrada de tecido empresarial ou industrial", tal e como apuntou para reforzar a idea de que a pasteira debe quedar en Pontevedra.

Así, ante as sentenzas da Audiencia Nacional que tomban a prórroga da concesión dos terreos de Lourizán a Ence, Vieites insistiu en que a Xunta e o Goberno teñen que buscar "de maneira inmediata" como "mitigar os efectos que se poidan producir desde o punto de vista xurídico".

"Hai alternativas, a propia empresa aposta pola Galiza e sería un erro e un desánimo tremendo que a pasteira se vaia", sentenciou o presidente da patronal.

Imprimir

A patronal galega ábrese a cambiar "temas concretos" da reforma laboral "dentro do...
comentarios