O Goberno estatal aproba a alza do SMI e declara A Palma como zona catastrófica

A suba do salario mínimo é de 15 euros mensuais con 14 pagas desde o 1 de setembro. Con respecto á situación na illa da Palma logo da erupción volcánica, pactouse unha partida de 10,5 millóns de euros para os gastos máis urxentes.
Rolda de prensa despois do Consello de Ministros de onte, con Yolanda Díaz, Isabel Rodríguez e José Luis Escrivá. (Foto: A.Ortega.POOL / Europa Press)
photo_camera Rolda despois do Consello de Ministros, con Yolanda Díaz, Isabel Rodríguez e José Luis Escrivá. (Foto: A.Ortega. POOL / Europa Press)

O Consello de Ministros deu luz verde esta terza feira á suba do salario mínimo interprofesional (SMI) acordado o pasado 16 de setembro con CCOO e UXT, de 15 euros mensuais, polo que se sitúa desde o 1 de setembro en 965 euros ao mes con 14 pagas.

No documento recóllese o compromiso de que a alza alcance o 60% do salario medio antes de que remate a lexislatura -como prometeu o presidente español, Pedro Sánchez, e especifica a Carta Social Europea que asinou- por medio de revisións “progresivas” en 2022 e 2023.

Quedaron fóra do acordo as patronais CEOE e Cepyme, reiterando que a subida do SMI danaría a creación de emprego cando a economía está no comezo da recuperación.

Porén, este aumento, do 1,58%, queda lonxe do 2,2% de incremento de prezos no que vai de 2021, índice que, segundo distintas previsións, medrará até o 4% cara ao final do ano.

Axudas á Palma

No Consello de Ministros tamén se abordou a situación na illa canaria da Palma, onde o domingo 19 de setembro comezou unha erupción volcánica que xa afectou 686 edificacións, cunha lingua de lava que cubre 258 hectáreas.

Como anunciara Sánchez hai uns días, o gabinete aprobou a declaración de zona gravemente afectada por unha emerxencia de protección civil, como marco para impulsar as iniciativas do que Isabel Rodríguez, voceira do Executivo estatal e ministra de Política Territorial, definiu como un “plan especial de reconstrución da Palma”.

Para a “fase de urxencia”, sinalou, aprobouse unha partida de 10,5 millóns de euros. Un paquete de 5,5 millóns irá destinado a que o Goberno de Canarias adquira 107 vivendas na illa, para ofrecelas ás persoas que perderan a súa casa de xeito temporal ou permanente. En base á situación das beneficiarias impulsaranse condicións favorábeis de alugueiro ou compra da propiedade.

Estas vivendas só poderán volver ao mercado privado logo dun prazo de tres décadas e co visto e prace do Ministerio de Transportes, ao que Canarias terá que remitir unha xustificación co motivo polo que xa non son precisas para “fin social”.

Amais, 5 millóns de euros estarán dirixidos a mercar útiles de primeira necesidade para estas persoas. O acordo con Canarias contempla que se entreguen tarxetas moedeiro para axilizar o acceso a estas axudas.

O decreto, desenvolto polo Ministerio de Dereitos Sociais, o de Interior e o de Transportes, Mobilidade e Axenda Urbana, salienta a “magnitude da emerxencia”, que xerou unha “grave perturbación” das condicións de vida.

ERTE por mor do volcán

Entre as medidas de protección ao emprego insular, a vicepresidenta segunda e ministra de Traballo e Economía Social, Yolanda Díaz, indicou que haberá un ERTE específico para as empresas que viron afectada a súa actividade económica pola erupción, tanto na Palma como no resto do territorio canario.

O acordo permite exencións do 100% nas cotizacións sociais para as sociedades que non poden traballar, e do 90% para as que sufriran unha limitación parcial da actividade. Asemade, no pacto inclúese para as e os autónomos palmeiros unha prestación extraordinaria de catro meses.

Rodríguez tamén informou de que o Consello aprobou crear dúas comisións para xestionar o seguimento das medidas que se tomen con respecto á Palma.

A denominada “comisión mixta”, explicou a voceira, tivo a primeira xuntanza na tarde de onte, coa presenza de Sánchez, Fernando Grande-Marlaska (Interior), e Rodríguez (Política Territorial), así como a Delegación do Goberno estatal en Canarias, o presidente canario, Ángel Víctor Torres, e representantes do Cabildo da Palma e dos concello directamente afectados.

Ao tempo, 12 departamentos agruparanse nunha comisión interministerial.

Comentarios