A taxa de desemprego alcanza 11,2% da poboación activa, dúas décimas menos que no trimestre anterior, que estaba no 11,4%. Así, a taxa de desemprego galega sitúase un punto porcentual por baixo da media estatal, que foi de 12,48%. A ocupación aumentou en 1,27% no conxunto do país, con 13.900 novos postos de traballo con respecto ao trimestre anterior.
Desta maneira, o número de persoas ocupadas na Galiza situouse nos 1,10 millóns, 2,65% máis que no mesmo trimestre de 2021, gañando 28.500 novos postos desde xuño do ano previo, dos que 52% son homes e 48%, mulleres. O número de persoas desempregadas descendeu en 12.900 nos últimos doce meses, 8,49% menos que entre abril e xuño do exercicio previo. Do total de 139.400 persoas desempregadas, 48,5% son homes e 51,5%, mulleres.
Porén, a ocupación con respecto ao trimestre anterior aumentou na Galiza a menor ritmo que no conxunto do Estado español, sendo o sexto territorio estatal cun peor resultado. Mentres que a Galiza experimentou unha suba de 1,27% na ocupación con respecto ao trimestre anterior, esta porcentaxe de incremento no Estado foi de 1,91%.
Con respecto ao aumento de persoas ocupadas, a Galiza volve estar por baixo da media estatal, mentres o número de novas contratacións aumentou 2,65% no país, no conxunto do Estado foi de 4,05%, sendo neste caso o territorio galego o sétimo con peores datos.
Ademais, na Galiza hai máis de 1,24 millóns de persoas activas (persoas con emprego ou na súa procura), o que supón 0,99% máis que no trimestre anterior e 1,27% máis que entre abril e xuño de 2021. Deste modo, a taxa de actividade alcanzou 53,16% na Galiza, até cinco puntos porcentuais por baixo da media do Estado español, que se situou en 58,71%.
Contratación parcial
A EPA amosa que máis da metade da poboación ocupada da Galiza ten xornadas de traballo de menos de 40 horas á semana. En concreto, 50,1% das persoas ocupadas na Galiza traballa menos de 40 horas semanais, cando no trimestre anterior esta cifra atinxía 48,3%.
Así, o colectivo que máis medrou neste período foi o que declara traballar entre 20 e 29 horas semanais, que se incrementou en 43.200 persoas. Pola contra, o grupo que máis se reduciu é o de 40 a 49 horas.
Reacción dos sindicatos
A CIG criticou que a última reforma laboral "siga a influenciar de modo negativo no mercado laboral, provocando un aumento da parcialidade do emprego e a conseguinte redución dos ingresos da clase traballadora". "A ocupación baixa na construción e na industrias, e o único medre, ademais de no sector servizos, rexistrouse no primario, especialmente na pesca", destacou o sindicato.
Pola súa parte, CCOO destacou que a Galiza "ten máis e mellor emprego", mais que "agora toca mellorar a protección social". "O incremento do emprego en 2022 é inferior ao do ano anterior polas mesmas datas", engadiron.
A UXT advertiu "que os indicadores na Galiza son peores que no resto do Estado". Ademais, o sindicato defendeu que "a mellora do emprego exixe unha suba xeneralizada dos salarios".