As tres universidades públicas galegas: Universidade de Santiago de Compostela (USC), Universidade da Coruña (UDC) e Universidade de Vigo (UVigo) xa desenvolven máis dunha vintena de proxectos de alto impacto sobre Intelixencia Artificial (IA) que sitúan Galiza “na vangarda da investigación” sobre as aplicacións e efectos desta materia no ámbito europeo.
Así o sinalou a Axencia para a Modernización Tecnolóxica de Galicia (Amtega), un feito que, tal e como sinalou esta segunda feira a ministra de Política Territorial, Isabel Rodríguez, foi unha das chaves para elixir a cidade da Coruña como sede da Axencia de Supervisión da Intelixencia Artificial (Aesia).
Todos estes proxectos trátanse de iniciativas que contan con financiamento público procedente de plans europeos, estatais e galegos.
Proxectos da USC
O Centro Singular de Investigación en Tecnoloxías Intelixentes (Citius) da USC lidera ou participa en varias iniciativas de alto impacto sobre Intelixencia Artificial.
Entre elas, destaca o chamado 'Proxecto Nós', que a USC desenvolve xunto co Instituto Galego da Lingua (ILG) co obxectivo de situar o idioma galego "en pé de igualdade" con outras linguas do mundo no ámbito da intelixencia artificial e as Tecnoloxías da Información e a Comunicación (TIC).
'Proxecto Nós' permitirá recompilar e desenvolver recursos e ferramentas para o procesamento automático do galego, tanto oral como escrito. Uns recursos que se distribuirán baixo licenzas libres para facilitar o desenvolvemento de produtos e servizos por parte de empresas e outras organizacións públicas ou privadas.
Así mesmo, desde a USC levan a cabo outros proxectos que pretenden adaptar a través da tecnoloxía a eficiencia administrativa da Xunta da Galiza co fin de poder ofrecer un mellor servizo á cidadanía, así como un plan co que buscar solucións adecuadas para a comprensión humana dos algoritmos da Intelixencia Artificial.
Iniciativas da UDC
Pola súa parte, a UDC leva a cabo o desenvolvemento de robots co propósito de desenvolver unha nova xeración que conte cun maior nivel de autonomía.
A UDC tamén desenvolve un proxecto do Consello Europeo de Investigación (ERC) que pretende atopar solucións para os "pescozos de botella" que implican as limitacións actuais do hardware estándar e os altos custos computacionais dos algoritmos de procesamento natural da linguaxe.
Outro dos proxectos que se poñen en marcha desde a UDC é o 'Programa de Doutoramento Internacional, Interdisciplinario e Intersectorial en Tecnoloxías da Información e as Comunicacións'.
Plans da UVigo
A UVigo destaca cun proxecto para o desenvolvemento dun marco de estegoanálise eficiente que pretende descubrir datos ocultos en medios dixitais.
De igual maneira, esta institución académica colabora co Instituto de Investigación Sanitaria Galicia Sur no 'Proxecto PolyDeep', un sistema intelixente de detección e clasificación en tempo real de lesións colorrectais mediante deep learning (aprendizaxe profunda).
