Sumar Galicia incluíu nas súas candidaturas para as eleccións do 18 de febreiro as súas 'fichaxes' do PSOE e Podemos Galicia, o ex edil socialista na Coruña Juan Díaz Villoslada e a ex secretaria de Organización dos morados Gloria Alonso, mentres que o histórico sindicalista Suso Díaz, pai da vicepresidenta segunda e líder de Sumar, Yolanda Díaz, fechará co número 25 na circunscrición da Coruña.
Entre os nomes da candidatura, segundo fontes citadas pola axencia Europa Press, tamén se atopan o do ex alcalde de Ferrol Jorge Suárez (Ferrol en Común), que concorrerá no número sete da lista da Coruña, na que Díaz Villoslada será o número catro e na que tamén estarán Dolores Caramés Hermo, concelleira en Noia, e Xosé Lois Piñeiro, ex alcalde da Pobra, do mesmo modo que o concelleiro Manolo Seixas.
A lista da Coruña estará encabezada pola candidata á Presidencia da Xunta, Marta Lois, que leva como número dous Paulo Carlos López, actual portavoz de Movemento Sumar e co que comparte, ademais de departamento académico na Universidade de Santiago de Compostela, o impulso na Galiza do proxecto de Yolanda Díaz. Tamén se inclúe de novo a académica e escritora Marilar Aleixandre, que se vinculou desde os seus inicios ás mareas.
Na circunscrición de Pontevedra, que encabeza o ex dirixente de CCOO Ramón Sarmiento, atópanse Gloria Alonso, ex dirixente de Podemos Galicia e ligada tamén ao mundo sindical, que irá de número sete. Destacan tamén nesta circunscrición a educadora social Rocío Núñez; Jesús Araújo Nores, de SOS Sanidade Pública; Xurxo Charlín, da 'marea' de Cambados, ou Lara Rodríguez Pena, que liderou a lista da plataforma cidadá Apac e gobernou con Rafa Cuiña (Compromiso por Galicia) en Lalín (Deza).
O posto número dous da lista por Pontevedra correspondíalle designalo a Esquerda Unida e, neste caso, será Raquel de Ana Rodríguez. En canto á candidatura da Coruña, destaca o nome de Carmen Armada, anterior coordinadora local de EU, no posto número oito.
Ensino e sindicalismo
En canto á cabeza de lista, Sumar situou dous docentes universitarios e dous perfís do sindicalismo de CCOO. Así, se Marta Lois, que é investigadora e docente na Universidade de Santiago de Compostela, é a candidata á Presidencia da Xunta, séguea como número dous pola Coruña o portavoz de Movemento Sumar e tamén profesor universitario, Paulo Carlos López.
Ademais, despois de que a pasada sexta feira Sumar confirmase o nome de Ramón Sarmiento —ex líder de CCOO na Galiza— como cabeza de lista por Pontevedra; coñécese tamén a inclusión do profesor de Física da USC José Rodríguez Añón, con raíces na Mariña e que xa fora o número un nas pasadas eleccións estatais do 23-X. Será o 'un' por Lugo. Finalmente, en Ourense Mercedes González Pazos, funcionaria da Xunta e delegada sindical de CCOO, será a cabeza de lista.