Estas son as forzas políticas que defenden o último (e decisivo) escano en cada circunscrición, e a distancia á que está o partido político que podería arrebatarllo, segundo o último barómetro elaborado polo Instituto Demoscópico EM-Analytics para 'Nós Diario', correspondente a este domingo, 4 de febreiro.
A repartición de escanos por medio da Lei D'Hondt e a elevada barreira electoral que impuxo no país o popular Manuel Fraga (5%) xogarán un papel decisivo na configuración da 'foto final' do vindeiro 18 de febreiro. Na circunscrición da Coruña están en xogo 25 escanos; na de Pontevedra, 22, e nas de Lugo e Ourense, 14 en cada unha delas. A batalla pola última acta para entrar no Parlamento da Galiza será crucial e determinará o resultado das eleccións.
E quen tería nestes momentos ese último escano e quen podería arrebatarllo? Con base no barómetro electoral elaborado polo Instituto Demoscópico EM-Analytics para Nós Diario que se publica íntegro no xornal deste domingo, 4 de febreiro, o BNG sería a formación política que fecharía a repartición de escanos en dúas das catro circunscricións —A Coruña e Pontevedra— e, por tanto, tamén a que podería perdelos máis facilmente.
Pola contra, na de Lugo esa última acta sería para o Partido Popular, que mantería unha vantaxe de 2,3 puntos porcentuais sobre o seu inmediato competidor, o PSdeG. No caso de Ourense, o 'escano coxo' é novamente dos populares, en disputa co BNG, a 2,1 puntos. De perder estas dúas actas, o PP ficaría con 36 escanos, a dous da absoluta.
