"Plan Integral de Modernización da Rede Ferroviaria da Galiza", así se titula un dos puntos máis salientábeis do preacordo que o BNG alcanzou co candidato á Presidencia do Goberno español, Pedro Sánchez para a investidura deste. Así o anunciaron desde a formación nacionalista.
O primeiro punto desta parte do acordo, ao que tivo acceso Nós Diario, comprométese a “realizar un estudo para a implantación de tren de proximidade na Galiza, tendo en conta as necesidades da infraestrutura, o material móbil e a dispoñibilidade de persoal, para que, antes do final de lexislatura, Galiza conte con servizo de proximidade”.
Corredor Atlántico
Outro dos puntos indica que busca “impulsar as actuacións do corredor Atlántico, e acelerar os traballos no tramo de conexión entre Vigo e a Fronteira Portuguesa incluíndo o saída sur de Vigo, que forman parte da Rede Básica Ampliada para garantir a súa posta en servizo na contorna de 2030”.
“Aceleraranse os traballos de modernización da liña Guillarei-Ourense, de viaxeiros e mercadorías, así como estudo funcional da duplicación e migración a ancho estándar e avanzarase nos traballos (comezando por realizar un estudo funcional) para a modernización e electrificación da liña ferroviaria A Coruña-Lugo entre Betanzos e Lugo”, prosegue o acordo.
Segundo o texto de preacordo dos nacionalistas co PSOE, “iniciaranse en 2023 os trámites administrativos para a execución do baipás de Betanzos, (que estará en execución antes de terminar a presente lexislatura), coa exposición pública do estudo informativo e culminarase o estudo funcional xa en curso entre A Coruña e Ferrol para a modernización desta liña e iniciarase o estudo informativo en 2024”.
Licitar en 2024 un estudo dunha variante entre Curtis e Ordes que facilite a conexión ferroviaria entre Lugo e Santiago de Compostela ou axilizar a aprobación da Orde Ministerial de denominación da Estación Intermodal de Santiago "Daniel Castelao" e programar o uso dos seus espazos comúns para a difusión do legado artístico, cultural e político de Castelao en coordinación co Concello de Santiago de Compostela, tamén son puntos presentes no acordo.
"Trato homoxéneo"
“Recuperaranse as frecuencias de Obriga de Servizo Público (OSP) previas á pandemia e estudarase a necesidade dun aumento de servizos na rede ferroviaria estatal na Galiza. Aplicarase o mesmo trato homoxéneo aos usuarios de proximidades na Galiza que noutros territorios e continuaranse os traballos de modernización. Mellorarase a atención aos viaxeiros nas estacións e reforzarase a presenza de revisores os trens e elaborarase un plan de substitución e mellora do material rodante empregado nos servizos Vigo-Porto, e estudarase a mellora das frecuencias”, son outros dos puntos que foron acordados entre BNG e PSOE.
