A xornada comezou pouco antes do mediodía cun encontro no Coto, no linde entre as dúas bisbarras, punto de partida cara ao monólito de Saa, na volta de Ludeiro (Palas de Rei); lugar, a beira da estrada N-547, onde apareceron os corpos sen vida de Sixto Aguirre García e Camilo Díaz Baliño.
A Comisión da Memoria de Palas, Toques e Melide iniciou nese punto un percorrido de recoñecemento e tributo ás persoas que, por defenderen a xustiza e a liberdade, foron vítimas da represión nos anos da "longa noite de pedra".
Saa
Sixto Aguirre, estudante de medicina e afiliado a Esquerda Republicana foi "paseado" canda Díaz Baliño, membro das Irmandades da Fala e militante do Partido Galeguista, asasinado en Palas de rei o 14 de agosto de 1936.
Desde Saa, o paseo da memoria continuou cara a Vilouriz, Toques, de onde era natural o ebanista, sindicalisat da CNT, Marcial Villamor Varela, detido en Lugo e asasinado en guntín en 1937 cando era trasladado a Compostela.
Vilamor
Ramón Rodríguez Varela, 'Curuxás', tamén veciño de Vilouriz, foi homenaxeado en Vilamor, onde faleceu en 1967 após 31 anos de persecución franquista.
Piñeiro
A seguir, en Piñeiro, foi recordado Delfino Liñeira Fraga, directivo do Sindicato de Tranviarios da Coruña, da CNT, xulgado por rebelión militar e executado na Coruña en 1937.C
Curbián
Curbián foi o lugar escollido para rememorar a Benedicto Fuentes Díaz, mariñeiro, natural de Viveiro. Morreu o 1 de febreiro de 1947 no lugar da homenaxe durante un encontro coa Garda Civil.
Ramil
A última parada foi en Ramil, na Eira da Xoana, onde despois dun xantar de confraternidade tivo lugar no monólito da Eira un acto de recoñecemento ao alcalde republicano de Agolada Primo Castro Vila, destituído do seu cargo en agosto do 36, fuxido e finado en Brántega en 1950.
O acto serviu de homenaxe "a todas as persoas que sufriron persecución polo seu compromiso coas causas xustas" antes da intervención final de Adela Figueroa Panisse, vogal de Adega e autora do libro A quadraturta do círculo que inclúe un relato aos mestres da República que sufriron represalias e castigos.
