Alexandre Bóveda revive nos actos conmemorativos do Día da Galiza Mártir

Poio e Pontevedra acolleron os actos máis concorridos do Día da Galiza Mártir. O lugar da Caeira, en Poio, onde foi asasinado Alexandre Bóveda, e a cidade Pontevedra, na que se estabeleceu e residiu nos últimos anos da súa vida, xuntaron centos de persoas que acudiron a homenaxear o líder nacionalista executado polo franquismo o 17 de agosto de 1936. Precisamente, a primeira das localidades foi escollida pola Fundación Alexandre Bóveda para lembrar o mártir nacionalista. O acto da Fundación Alexandre Bóveda contou coa presenza de numerosos asistentes, así como de representantes de todo o abano ideolóxico do país, de diferentes entidades sociais e de diversas institucións galegas. No mesmo tomaron a palabra o presidente da Fundación Castelao, Miguel Anxo Seixas, o vicepresidente do colectivo organizador, David Otero, o alcalde de Poio, Ángel Moldes (PP), o presidente de Capitán Gosende, Calros Solla e mais Amalia Bóveda, filla do homenaxeado. Seixas abriu o acto lembrando as orixes do Día da Galiza Mártir e significou que esta homenaxe a Alexandre Bóveda coincidía co 75 aniversario do discurso "Alba de Gloria". Neste sentido, recordou que a data foi instaurada en 1942 polos nacionalistas exiliados en Bos Aires, a proposta de Daniel Castelao, quen “no Alba de Gloria cualificou Alexandre Bóveda como estrela e bandeira do noso porvir”. Moldes, pola súa parte, indicou que “mentres eu estea na Alcaldía deste Concello, a figura de Bóveda estará viva e non será só celebrar o Día da Galiza Mártir, senón que será un traballo constante da man da fundación e da súa familia”. A este respecto, apuntou que “hoxe aquí estaremos persoas con ideas políticas totalmente distintas. Pero estou seguro de que a todos nos une a figura de Bóveda. Bóveda é patrimonio de todos e de todas. Bóveda é patrimonio da Galiza. E como ben se dixo aquí, Bóveda é Galiza”. David Otero O vicepresidente da fundación sinalou na súa intervención que “Bóveda está nas responsabilidades de cada día para que desde el, e na memoria, teñamos en presente os nosos e as nosas mártires, así como as demais vítimas da inxustiza dimanada e executada da represión fascista personificada no xeneralísimo Francisco Franco”. Otero asegurou que “gustaríanos que neste acto se afirmen probas irrefutábeis das nosas alianzas, das nosas complicidades, co Bovedismo ( que é dicilo co galeguismo e co nacionalismo), pois Bóveda non é un slogan, nin un titular nos medios de fabulación, nin un autocolante simplemente. O seu discurso non é unha proclama máis ou menos acendida. A valía vai nos feitos e nas obras, as cales collen brillo nas verdades”. O vicepresidente da fundación rematou afirmando que “a nosa memoria é busca, é desbroce, e así para faena, todas e todos temos que afiarlle ben con pedra gadaña...as cinco puntas á estrela nosa de liberdade. Iso será para facer boa sega comunal e mellor seitura popular, pois Bóveda é militancia e, xuntos con el, Galiza somos nós. E así perante del e das e dos nosos mártires, debemos facernos responsábeis das nosas condutas éticas de cidadanía e tamén políticas”. Solla, que este ano recibiu o XII Premio Galiza Mártir outorgado pola fundación polo seu labor a prol da recuperación da memoria democrática, tomou o relevo a Otero instando o conselleiro de Cultura, Román Rodríguez, presente no acto, a “institucionalizar, dunha vez por todas, o 17 de agosto como Día da Galiza Mártir” porque “Alexandre Bóveda representa todas as vítimas do franquismo, represéntaas a todas elas e, sen fisuras, debera representarnos a todos nós”. Solla reclamou a Rodríguez que “aconselle ben o señor presidente da Xunta para, na medida das posibilidades de todos, sexamos quen de manter Galiza afastada das poutas do fascismo reorganizado, dos que enaltecen o golpe de Estado do 36 e a ditadura. Manteñamos o noso país a resgardo da ideoloxía que asasinou Alexandre Bóveda e milleiros de republicanos na Galiza”. O presidente do colectivo Capitán Gosende de Cerdedo acabou a súa intervención referíndose ao “irmán Alexandre Bóveda, guieiro”. Parafraseando as palabras deste diante do tribunal franquista que o condenou a morte, concluíu afirmando que “eu tamén desexo facer o ben, traballar pola Galiza e pola República galega, e se o confundido xuízo dos homes me condena, aceptarei a condena de bo grao como un servizo máis á miña nación”. Amalia Bóveda O acto de homenaxe a Bóveda foi fechado pola súa filla Amalia, quen chamou a celebrar “o noso dereito á memoria”, un “dereito á memoria colectiva, negado tantos anos, que estas efemérides foron a mellor e máxima expresión no exercicio público da mesma. Mais debemos transcender e sobrepasar isto”. Bóveda demandou unha mudanza nas políticas públicas de memoria, sinalando que “hoxe homenaxeamos os que quixeron consolidar o galeguismo económico, e froito diso foron asasinados. Este, seu país, precisa pois de galeguismo orzamentario, porque do que imos sobrados é de galeguismo de vocabulario e de homenaxes de escenario”. Pola tarde, a fundación e mais o Partido Galeguista organizaron un acto relixioso e outro cívico no cemiterio pontevedrés de San Amaro, coas intervencións, entre outros, do presidente do Parlamento, Miguel Santalices, e do secretario xeral de Política Lingüística, Valentín García. O BNG defende a vixencia da loita e dos principios de Alexandre Bóveda A praza Curros Enríquez de Pontevedra acolleu ás 20 horas o tradicional acto do BNG con motivo do Día da Galiza Mártir, que foi aberto pola militante de Galiza Nova, Irea Ferreiro. Na súa intervención, destacou a morte de Bóveda “como a faísca que iniciou que a xente moza tomase consciencia e mantivese viva a loita pola que o mataron”. Nesta liña, asegurou que “esa loita chegou até hoxe en día para que a súa memoria se siga a recordar”. A alcaldesa nacionalista de Pontecesures, Maite Tocino, tomou o relevo de Ferreiro destacando que “teñen pasado 87 anos do asasinato de Bóveda, mais os principios, a coherencia e a loita por procurar unha sociedade xusta, igualitaria e avanzada seguen vixentes na actualidade”. A rexedora lembrou no seu discurso Carmiña Sierra, cesureña e primeira muller socia do Seminario de Estudos Galegos, detida polo franquismo e, posteriormente, exiliada en Venezuela. A continuación, interveu o alcalde de Soutomaior e membro da Executiva do BNG, Manuel Lourenzo, quen apostou por defender o legado de Bóveda “sen ambigüidades” e criticou a presenza do PP na homenaxe da Fundación Alexandre Bóveda como unha tentativa de “branquear e revisar a historia con posturas asimilábeis ao que está a facer a ultradereita, que non é algo de recibo”. Nesta dirección, concluíu que “se a figura de Bóveda chegou a nós foi porque a verdade triunfou sobre a mentira. Non podemos permitir que a vida de Bóveda sexa dobremente asasinada: fisicamente no seu momento e agora enterrada nunha historia revisada e parte da mentira”.