alfareme.- (Ademais doutros significados rexistrados) Cacharreiro, oleiro.
Lugar de escoita.- Saavedra (Begonte).
Fonte.- María Celina Cruz Rodríguez.
creb/vante.- Descanso momentáneo acompañado de lixeira somnolencia que se produce despois de comer e bótase mesmo na mesa e en compaña doutros debido á súa breve duración.
Exemplo.- “Déixao, que está a botar un creb/vante.”
Lugar de escoita.- Derrasa (Ourense).
Fonte.- Olga Rodríguez Díaz.
encomar.- (Ademais de significados xa rexistrados) Quedar durmido sentado.
Lugar de escoita.- O Courel.
Fonte.- Dun vocabulario courelao.
enxarecer.- Conciliar o sono, adormecer, prender no sono. Enxarecido/a: adurmiñado/a, amorriñado/a ou enfadado/a.
Exemplo.- “Aínda non enxarecía e xa me tiven que erguer.”
Lugar de escoita.- San Martiño (Vilaboa do Morrazo).
Fonte.- Sé Anxo Rosales González.
esmorzoar/se.- Poñerse a descansar nun lugar, deitándose ou sentando comodamente, sen ánimo de traballar.
Exemplo.- “Este fillo meu pasa todas as vacacións esmorzoado no sofá vendo a televisión.”
Lugar de escoita.- Burela (Mariña luguesa).
Fonte.- Mario Ferreira.
ter gaia (pronunciado ghaia).- Ter poucas ganas de facer algo.
Lugar de escoita.- Cariño.
Fonte.- Simón Rey.
