esbrugo/a.- Puro, sen mestura, esburo.
Exemplo.- “Pisou un cagallón de merda esbruga.”
Lugar de escoita.- Nigrán.
Fonte.- Albino Soto Figueroa.
estar baticano-a/vaticano-a.- Úsase para indicar experiencia: esa persoa ten experiencia ou é experta.
Exemplo.- “Está moi baticano-a/vaticano-a niso.”
Lugar de escoita.- Indeterminado.
Fonte.- Manuel Cabada Castro.
Outros apuntamentos.- Comenta a fonte que a persoa que lle falou sobre esta expresión indicoulle que pensa se será un vulgarismo de batucado-a, por ser máis doado pronunciar baticano que batucado. Nese caso tería un significado máis concreto, o de ter a experiencia de ser golpeado-a ou sufrir por algo, polo que se inclina pola ortografía co b. Non se me ocorre nada para explicar que vaticano-a teña ese significado de experiencia.
morriñento.- (Ademais de significados xa coñecidos) Porco, porcallán.
Lugar de escoita.- Muxía.
Fonte.- Proxecto Buserana de Muxía.
remanguicho.- Persoa cunha capacidade extraordinaria para organizar tarefas. Persoa que organiza máis alá do que se lle recoñece como asunto seu. (En forma despectiva).
Exemplo.- “Estás feita un remanguicho.”
Lugar de escoita.- Vigo.
Fonte.- Begoña Caldas Rodríguez.
Outros apuntamentos.- Recollida da súa nai, Paz Caldas.
zarrupio/a.- Que ten un aspecto sucio.
Lugar de escoita.- Cambados.
Fonte.- María Isabel Fernández Vidal.
Outros apuntamentos.- Suxerida por Álvaro Durán Bianchi, do CPR Ángel de la Guarda (Nigrán, Pontevedra), escoitada en Cambados.