Os tractores lusos fechan a fronteira leste para exixir condicións xustas

15 estradas, entre elas dúas autoestradas, foron cortadas hoxe en Portugal polas protestas das e dos labregos, que se estenderon de norte a sur do territorio continental luso, informou a Guarda Nacional Republicana. Unha parte significativa das mobilizacións desenvolveuse na fronteira leste de Portugal, nos cruces co Estado español, cun especial impacto do bloqueo da autoestrada A6, que conecta coa cidade española de Badaxoz, e na estrada 260/IP8 en Vila Verde de Ficalho, na vía que une Lisboa con Huelva, Sevilla e o sur do Estado español, frecuentemente usada polos camións que moven alimentos ou combustíbel. O Movimento Civil de Agricultores, que convocou unhas protestas que en distintos lugares se xeraron de forma espontánea, reiterou que busca que a actividade sexa valorada e conte con condicións xustas. Nese sentido, centenares de tractores e máquinas agrícolas protagonizaron unha marcha lenta camiño a Coimbra que non estaba programada pola organización. Desde Vila Verde de Ficalho, o labrego Diogo Morgado comunicou ao xornal luso Público que “imos ficar aquí o resto do día, mañá e logo verase como imos facer”, e Diogo Brito, do Movimento, destacou á axencia Lusa que só se desmobilizarán cando as súas reivindicacións sexan escoitadas. Na véspera da protesta, o Executivo luso notificou que dedicará case 500 millóns de euros para responder á seca no país e para reforzar as axudas da Política Agraria Común (PAC) da Unión Europea (UE). Porén, Álvaro Mendonça, presidente da Confederação dos Agricultores de Portugal, insistiu en que os apoios reais para o sector só suman 62 millóns de euros. A organización non se uniu polo de agora ás protestas. En Francia, que azuou as mobilizacións labregas que decorren en Estados da UE como Grecia, Alemaña, Bélxica, Italia, Países Baixos, Polonia ou Romanía, o Goberno de Emmanuel Macron anunciou hoxe unha nova vaga de medidas para aplacar os bloqueos, como a suspensión dun plan para reducir o uso de pesticidas e a flexibilización das normas que exixen ás persoas agricultoras manter áreas de pasto. Tamén fixo público que realizarán “máis de 10.000 controis sobre a orixe francesa dos produtos” e un reforzo da normativa que fixa as relacións entre as e os produtores e as grandes distribuidoras. “Todas as grandes cadeas de supermercados serán controladas nos próximos días”, defendeu o ministro de Economía, Bruno Le Maire. Con posterioridade, a Federación Nacional dos Sindicatos de Labregos e Xoves Agricultores, os principais sindicatos agrícolas franceses, pediron a “suspensión dos bloqueos” para “iniciar unha nova forma de mobilización”, sostendo que “fomos escoitados nalgúns puntos”. Tanto o Executivo francés como a UE foron desenvolvendo nas últimas xornadas diversas medidas para responder as reivindicacións labregas, como limitar as importacións de Ucraína ou flexibilizar os criterios da PAC. En última instancia, Macron propuxo crear unha “forza europea de control sanitario e agrícola” que impida a “competencia desleal” dentro da UE. A progresista Confederación Labrega uniuse ás organizacións ecoloxistas e cuestionou a fin do programa para diminuír o uso de pesticidas, o que implica “seguir deteriorando a saúde dos agricultores, os nosos chans e o noso medio ambiente”, e mais “proseguir engordando as multinacionais fabricantes de pesticidas”. A terceira forza sindical agraria de Francia transmitiu que continuará coas mobilizacións até lograr a “principal reivindicación do movemento”, que se prohiba comprar mercadorías agrícolas por baixo do seu custo de produción. No que atinxe a Bruxelas, a capital belga, onde hoxe transcorreu unha xuntanza do Consello Europeo, aproximadamente 1.300 tractores ou máquinas agrícolas, segundo a Policía municipal, bloqueaban as estradas da urbe, no marco da convocatoria da Coordinadora Europea Vía Labrega para exixir que o bloque comunitario poña fin aos tratados de libre comercio polos seus efectos para as e os labregos. Xa na praza de Luxemburgo, fronte á sede do Parlamento da UE, as e os agricultores prenderon múltiples fogueiras e derrubaron a estatua do empresario británico John Cockerill, que se mudou a Bélxica a comezos do século XIX, antes de queimala. Paquete de axuda para Ucraína Na cimeira, e logo de que o primeiro ministro de ultradereita húngaro, Viktor Orbán, vetara a iniciativa en decembro, o Consello Europeo aprobou nun debate de apenas dez minutos a modificación do orzamento comunitario para incluír un paquete de 50.000 millóns de euros en axuda financeira para Ucraína. A unanimidade entre as Xefas e Xefes de Estado ou de Goberno dos membros, requirida para aprobar a proposta, logrouse após incluírse dous condicionantes no texto final, que cada ano o Consello Europeo efectúe un debate para analizar o estado do paquete e que o órgano poida reclamar dentro de dous exercicios ao Executivo da UE que leve a cabo unha análise dos fondos, para os que tamén se estabeleceron uns requisitos que Kíiv debe cumprir para poder acceder a eles. Asemade, pactouse incluír no documento final un parágrafo que asegura que as medidas para bloquear fondos por presuntos ataques ao Estado de dereito teñen que ser “proporcionais á repercusión que teña a vulneración”. Bruxelas ten conxelados arredor de 21.000 millóns de euros dos fondos destinados a Hungría. Xusto antes do Consello Europeo de decembro, no que se pactou comezar as conversas de adhesión con Ucraína e Moldova, a UE desbloqueou 10.200 millóns de euros dirixidos a Hungría cando Orbán ameazaba con impedir a decisión. De cara a esta xuntanza, advertira que o paquete de axuda a Ucraína estaba ligado coa desconxelación dos seus fondos, defendendo que non fora incluído dentro do orzamento comunitario. Nos días previos á reunión filtrouse un documento da UE no que programaba atacar a economía húngara, intentar debilitar a súa moeda, o florín, e tratar de reducir a confianza das e dos investidores no país no caso de que Orbán volvese bloquear o paquete para Ucraína. Varios Estados membros defenderon amais activar o artigo 7 do Tratado da UE para retirar o dereito de voto a Budapest, o que permitiría evitar o veto maxiar. O propio Orbán explicou que aceptou o paquete despois de recibir “garantías” de que os cartos para Hungría “non rematarán en Ucraína”. O presidente ucraíno, Volodimir Zelenski, celebrou a decisión do Consello Europeo, ao tempo que demandaba que Bruxelas aprobe entregarlle axuda militar por valor de 5.000 millóns de euros cada un dos vindeiros catro anos. Desde a invasión rusa até o 31 de outubro de 2023 os países membros ou da contorna da Organización do Tratado do Atlántico Norte (OTAN) comprometéronse con Kíiv a entregar máis de 230.000 millóns de euros, deles máis de 90.000 millóns de euros corresponden a armamento. A resolución no seo da UE é especialmente importante para Ucraína polo bloqueo no lexislativo dos Estados Unidos, o seu maior provedor de armas, a unha proposta para destinar novos fondos para o Estado eslavo. Ademais, chega ao intensificarse o choque entre Zelenski e o líder das Forzas Armadas, Valeri Zaluzhni, ao que segundo o xornal Financial Times o mandatario busca destituír, e até lle ofreceu un posto no Ministerio de Defensa ao pedir a súa renuncia, que tería rexeitado. As protestas asaltan Tesalónica A segunda cidade máis poboada de Grecia, Tesalónica, encheuse onte de tractores nas mobilizacións do rural. As forzas sindicais agrarias cuestionan o incremento dos custos de produción e a competencia desleal que causan os tratados de libre comercio de Bruxelas. “Escoitamos a UE falar da súa ‘axenda verde’ pero ao mesmo tempo vemos importacións basicamente ilimitadas de terceiros países sen ningún control”, denunciou Diamantis Diamantopoulos, líder da Asociación de Agricultores de Serres.