Miles de simpatizantes do clérigo iraquí Muqtada al Sadr volveron a tomar por segunda vez esta semana o Parlamento na capital, Bagdad, durante unha nova protesta multitudinaria contra a candidatura do político xiíta Mohamed Shia al Sudani, proiraní contrario ao relixioso, como primeiro ministro, e que de momento se salda xa con 125 feridos como consecuencia dos conseguintes enfrontamentos coas forzas de seguridade.
A incursión no Parlamento tivo lugar horas despois do comezo das concentracións na Zona Verde de Bagdad, un dos sectores máis protexidos da capital, que alberga á maior parte das embaixadas internacionais e sedes institucionais do Goberno iraquí, entre elas o propio Lexislativo.
"Os manifestantes pasaron as barreiras de formigón de primeira liña que as forzas de seguridade iraquís colocaron na ponte de Al Jumhuriya, nun intento de chegar á Zona Verde", comezaron a indicar á primeira hora deste sábado fontes da axencia Shafaq.
De momento, e segundo a axencia oficial de noticias INA, os manifestantes do interior do Parlamento declararon unha sentada de carácter indefinido mentres outro grupo está a rodear xa as sedes do Consello Xudicial Supremo así como do Tribunal Federal Supremo do Estado, protexidas por un destacamento de seguridade.
O primeiro balance do Ministerio de Saúde iraquí cifra en 125 as persoas feridas, oito delas graves, polos enfrontamentos entre manifestantes e forzas de seguridade, que están a lanzar gases lacrimóxenos contra as persoas concentradas. O Ministerio confirmou a completa posta en marcha dos efectivos sanitarios da capital para atender e tratar ás persoas feridas.
A capital agora mesmo está case paralizada, ademais do de Al Jumhuriya, as pontes de Al Sanak, Al Ahrar e Al Shohada están fechadas, e o tráfico nas principais estradas e prazas de boa parte da cidade "está total ou parcialmente bloqueado".
Testemuñas da cadea Al Arabiya e de Rudaw confirmaron que unha multitude de seguidores do clérigo están a dirixirse tamén á praza de Tahrir entre berros contra a coalición Marco de Coordinación, un conxunto de partidos xiítas afíns a Irán, grandes derrotados nas lexislativas do ano pasado, nas que se fixo coa vitoria a alianza Sayirún.
Pola súa parte, o primeiro ministro iraquí, Mostafá al Kazemi, na súa primeira reacción ás novas protestas, exixiu ás persoas manifestantes que "se adhiran ao carácter pacífico da marcha e eviten calquera agravamento da violencia".
Un Estado dividido
Al Sudani, ex ministro de Traballo e Asuntos Sociais, foi presentado como candidato a primeiro ministro como suposto elixido de consenso para non enfurecer ao clérigo, cuxo máximo rival, o ex primeiro ministro Nuri al Maliki, é precisamente a figura máis destacada do Marco de Coordinación.
O grupo pro iraní decidiu dar un paso adiante nas manobras para formar Goberno, atascadas desde hai meses, despois de que o mes pasado os 73 deputados da coalición de Al Sadr, presentaran a súa dimisión en bloque como membros do Parlamento iraquí, fartos pola incapacidade para avanzar nas negociacións.
O sistema político iraquí está deseñado ao redor dun poder compartido entre sunnitas, xiítas e kurdos, mais en realidade está constantemente minguado polos regateos entre faccións, a corrupción e a discordia interna, da que tampouco se escapa o propio Marco de Coordinación, escenario de fortes disputas internas antes de elixir finalmente á Al Sudani como candidato.
