O Alto Comisionado da ONU para os Refuxiados (Acnur) vén de elevar a 3.974 a cifra de persoas civís mortas en Ucraína desde que principiou a guerra o pasado 24 de febreiro.
O servizo de prensa do Comité de Investigación de Rusia informou esta quinta feira do descubrimento dunha fosa común en territorio anteriormente controlado polas milicias e o Exército de Ucraína en Mariupol.
O organismo comunicou que está a solicitar elementos de proba para estabelecer casos criminais con relación a este achado, que as testemuñas describen como os restos de centenares de persoas falecidas.
"O Comité de Investigación de Rusia recollerá en causas penais os datos sobre o descubrimento dunha fosa común organizada por militares ucraínos na cidade de Mariupol", sinalou.
O alcalde local, Konstantín Iváschenko, explicou que a fosa común atopouse nun dos cemiterios da cidade, territorio que, confirmou, estivo controlado por milicias ultradereitistas ucraínas, como o batallón Azov.
"Segundo declaracións de residentes locais, chegaban vehículos a esta zona, en marzo, e os uniformados sacaban corpos para poñelos nas trincheiras previamente cavadas", afirmou.
22.000 persoas terían morto na batalla Mariupol
En declaracións á CNN, Petro Andriushchenko, un antigo asesor da Alcaldía de Mariupol fuxido a territorio ucraíno, dixo que as estimacións de persoas falecidas durante as batallas na cidade sería de cando menos 22.000.
A cifra de 22.000 está baseada, dixo Andriushchenko, nos "moitos contactos" que el e outras persoas colaboradoras do Goberno da cidade tiveron coas tropas ucraínas atrapadas dentro, mais cre que o número real podería ser moito máis alto. O ex asesor ucraíno tamén afirmou que "200 corpos foron descubertos nun edificio devastado por meses de bombardeo ruso".