Os acontecimentos sucédense a unha velocidade de vertixe. Ás 21.53 horas deu comezo unha conferencia de imprensa, de Roger Torrent. Nela avanzaba que proporía como candidato á investidura o ex conseller de Presidencia Jordi Turull, ao que Llarena atribúe os delitos de sedición, rebelión e malversación de fondos. "Todos somos conscientes das inxerencias [dos poderes xudiciais españois] sobre o Parlament das útlimas semanas", remarcou o president da cámara catalá, antes de anunciar que o pleno de investidura será esta quinta feira ás 17 horas.
"O pleno será para falar, para debater e finalmente para votar", afirmou Torrent, sen dúbida consciente de que en primeira instancia o candidato Turull non ten os apoios precisos (a maioría absoluta en primeira votación) para a investidura se consumar.
O obxectivo de JxCat e ERC -as formacións que apoian a investidura- é que Turull acuda esta sexta feira á citación do xuíz do Supremo Pablo Llarena xa investido como president da Generalitat.
Toda a presión colócase agora sobre a CUP, cuxos votos son precisos para a investidura de Turull se abrir paso. A formación anticapitalista convocou os meios esta mesma noite ás 22.45 horas.
NOTICIA EN AMPLIACIÓN.
