Miles de persoas marchan en Iruñea "por unha república vasca de persoas iguais e libres"

Miles de persoas macharon este domingo en Iruñea na manifestación convocada por EH Bildu con motivo do Aberri Eguna, Día da Patria Vasca., nunha xornada marcada pola proximidade das eleccións vacas de abril.  A coalición soberanista apuntou a que en Iruñea demostrouse que Euskal Herria "é un pobo vivo e que desexa decidir o seu futuro libre e democraticamente".

O coordinador xeral de EH Bildu, Arnaldo Otegi, defendeu que "a independencia non chegará se antes non chegamos aos gobernos" e destacou que a coalición abertzale ten "vocación de alternativa de Goberno" para demostrar que "este é un país que ten un proxecto nacional de soberanía ao servizo das maiorías sociais".

Así o afirmou durante a súa intervención no acto político que puxo ramo á mobilización polas rúas de Pamplona. A mobilización partiu pasadas as 12:15 horas desde a Praza de Europa ante unha persistente choiva encabezada por unha gran bandeira verde cun escudo representando os sete territorios que compoñen Euskal Herria. Tamén se viron numerosas bandeiras de Nfarroa e ikurriñas, así como bandeiras de Palestina.

"Somos unha nación"

O coordinador xeral de EH Bildu, Arnaldo Otegi; o candidato a lehendakari, Pello Otxandiano; o candidato nas eleccións europeas; Pernando Barrena; o alcalde de Iruñea, Joseba Asiron; entre outros.

Tamén estiveron presentes a eurodeputada de ERC, Diana Riba, e o responsábel de relacións internacionais e da Executiva do BNG, Rubén Cela, formacións coas que EH Bildu concorrerá ás eleccións europeas na coalición Agora Repúblicas.

A manifestación percorreu a avenida Baiona entre berros reclamando a independencia e música, flanqueados por ringleiras de persoas que recibían con aplausos os manifestantes. Finalizou no parque de Antoniutti onde interveu o coordinador xeral de EH Bildu, Arnaldo Otegi.

Otegi destacou que, fronte a quen di que o Aberri Eguna é "algo do pasado", "unha incongruencia histórica" ou un "costume", EH Bildu celebra todos os anos este día "para facer unha negación radical, democrática e popular" a que "haxa dous Estados que pretendan decidir por nós e por nós".

"Temos vocación de estado soberano"

Afirmou que "formamos parte dun proxecto nacional que ten vocación de alternativa de Goberno" pero, especialmente, unha "vocación de estado soberano, de estado independente e de República Vasca".

Incidiu na necesidade de "alcanzar os gobernos" para "demostrar que os independentistas somos capaces de manter o noso orgullo pola nosa vella nación", poñendo como exemplo "grandes mobilizacións de pensionistas ou unha folga feminista". 

Tamén para demostrar "mediante a nosa acción de Goberno que este é un país que ten un proxecto nacional de soberanía, que pon a soberanía ao servizo das maiorías sociais deste país".

"Orgullo de ser vangarda en dereitos sociais"

"Queremos tamén ter o orgullo de dicir que Euskal Herria é a vangarda en toda Europa dos dereitos sociais, da defensa da saúde, da defensa da educación, da defensa da terra e da defensa da repartición da riqueza", manifestou.

Arnaldo Otegi subliñou que "nós non temos nin ansiedades, nin présas; non imos con présa porque imos lonxe" porque "temos claro cal é o horizonte". Neste sentido, destacou que "estamos a xerar as condicións mediante o acceso e a articulación de grandes maiorías sociais e populares a determinados gobernos".

Mostrouse "persuadido de que a independencia deste país vai atravesar fases diferentes en cada conxuntura histórica". Asegurou que "a independencia non chegará se antes non chegamos aos gobernos e eses gobernos teñen que ser gobernos con propósito. Seguramente gobernos con outros". Algo que "nos permitirá acrecentar a base independentista".

"Non imos ter a independencia dun día para outro"

"Non alcanzaremos a independencia dun día para outro se non existen escenarios intermedios", engadiu o coordinador xeral de EH Bildu, quen remarcou que "ese é o camiño que temos trazado e ese é o camiño que xunto ao pobo traballador vasco percorreremos até alcanzar a República vasca. Que non lle caiba a menor dúbida a ninguén".

O dirixente de EH Bildu referiuse tamén ao conflito en Gaza e mandou un "abrazo solidario ao pobo palestino" que "está a sufrir un xenocidio" e "merece vivir en paz e con dignidade". Resaltou que "este é o país que votou que non á OTAN"; por iso, "en tempos de tambores de guerra esiximos desarmamento, paz e soberanía para todos os pobos".

O PNV, "crecer como nación"

Pola súa parte, o candidato a lehendakari do PNV, Imanol Pradales, afirmou este domingo que nas próximas eleccións vascas do 21 de abril está en xogo "crecer en benestar e como nación" coa formación jeltzale ou ir "para atrás como os cangrexos" con EH Bildu. "Hai que elixir entre un futuro mellor ou peor para Euskadi", asegurou.

Pradales participou no seu primeiro Aberri Eguna como candidato a lehendakari nunha Praza Nova de Bilbao ateigada de afiliados e simpatizantes do PNV que celebraron este Día da Patria Vasca baixo o lema 'Indar Berria, Euskadi Berria' (Nova Forza para unha Nova Euskadi).