Desde esta segunda feira xa se coñece a persoa candidata a lehendakari por EH Bildu. A Mesa Política da formación optou por Pello Otxandiano Kanpo, o seu director de Programa, nacido en Otxandio en 1983.
Supón unha clara aposta por unha nova xeración, xa apuntada nas palabras de Arnaldo Otegi hai un par de semanas, e tamén por unha forma de facer política baseada en futuro e “acordos de país”.
Adiantouno o xornal Naiz e confirmado publicamente por Otegi nunha comparecencia en Donostia, onde sinalou que a decisión de elixir Otxandiano foi adoptada por unanimidade pola Mesa Política.
Otegi destacou que a proposta de Pello Otxandiano é “un investimento cualitativo”, xa que “ninguén dubida da súa solvencia, nin capacidade nin compromiso con este país”.
Subliñou que EH Bildu apostou por el porque, ademais de achegar “solvencia, seguridade e compromiso”, Otxandiano “ten outras dúas cousas moi importantes: paixón por cambiar as cousas e alma por recuperar para este país o escenario que este país necesita e quere”.
Quen é Otxandiano?
Doutor en Enxeñaría de Telecomunicacións, Otxandiano xa foi definido anteriormente por algúns medios como o “ideólogo” de EH Bildu pola súa relevancia desde a dirección de Programas.
Así, foi impulsor principal do acordo de bases para unha nova Lei de Educación na Cámara vasca, finalmente ‘saboteado’ por PNV e PSE na fase de emendas.