Membros da familia do actual presidente estadounidense, Joe Biden, recibiron en 2017 máis dun millón de dólares que proviñan dunha empresa enerxética chinesa. Así se sostén nun documento publicado na madrugada desta sexta feira polo Comité de Rendición de Contas da Cámara de Representantes dos EUA, que analizou rexistros financeiros no marco dunha investigación sobre o tráfico de influencias e supostas tramas empresariais do mandatario.
Particularmente, no informe sinálase que desde 2015 até 2017 Hunter Biden (fillo do presidente), James Biden (irmán), Hallie Biden (nora) e un membro máis da familia, cuxa identidade é descoñecida, recibiron máis de 1,3 millóns de dólares en pagos desde contas vinculadas con Rob Walker, socio empresarial de Hunter Biden.
O Comité asegura que o 1 de marzo de 2017, menos de dous meses despois de que Joe Biden deixase a oficina da Vicepresidencia, a entidade chinesa State Energy HK Limited transferiu tres millóns de dólares á compañía de Walker.
Ao día seguinte, esa empresa remitiu 1,065 millóns de dólares a outra relacionada con James Gilliar, tamén socio da familia Biden.
Tras estas operacións, os membros da familia Biden recibiron esa suma de diñeiro nun espazo de tres meses, distribuída en varias contas bancarias.
"Dados os rexistros bancarios, parece que a familia Biden recibiu aproximadamente un terzo do diñeiro obtido da transferencia chinesa", engádese no comunicado oficial.
Ao comentar eses achados, o xefe republicano do Comité, James Comer, salientou que "non está claro que servizos se prestaron para obter esta exorbitante cantidade de diñeiro".
"Seguiremos indagando"
"O Comité de Rendición de Contas está preocupado polas implicacións para a seguridade nacional, derivadas de que a familia do presidente Biden reciba millóns de dólares de cidadáns estranxeiros", subliñou Comer, e agregou que seguirán indagando nos fluxos monetarios que puidesen comprometer o mandatario.
