Os asistentes da Casa Branca, nos EUA, descubriron un segundo lote de documentos clasificados pertencentes ao presidente Joe Biden, días despois de que se fixese público o descubrimento de documentos dunha antiga oficina privada do mandatario.
O novo lote atopouse nun lugar separado do primeiro e desde entón, os asistentes da Casa Branca estiveron buscando documentos clasificados adicionais noutros lugares.
Na cuarta feira, ao confirmar a noticia do descubrimento do primeiro lote de documentos, a secretaria de prensa da Casa Branca, Karine Jean-Pierre, evitou responder preguntas sobre por que a actual Administración non informou o público antes.
Segundo se coñeceu, os avogados de Biden fixeron o descubrimento o 2 de novembro pasado, xusto seis días antes das cruciais eleccións intermedias.
“O presidente falou disto persoalmente” sinalou Jean-Pierre, á vez que explicou que “isto está baixo investigación, baixo revisión por parte do Departamento de Xustiza, e imos deixar que ese proceso continúe”, agregou.
Biden abordou o asunto
Biden abordou na terza feira o asunto do primeiro lote. Dixo que descoñecía que documentos se atoparan e que os seus avogados lle dixeran que non buscase esa información.
Tamén expresou que estaba sorprendido de que tales rexistros se mantivesen alí.
A revelación inmediatamente xerou comparacións coa procura feita polo Buró Federal de Investigacións (FBI), o ano pasado, na propiedade en Mar-a-Lago do ex presidente Donald Trump.
Nesa ocasión os investigadores incautaron documentos clasificados como parte dunha investigación federal máis ampla sobre o posíbel mal manexo da información.
A Casa Branca deu a coñecer que coopera co Departamento de Xustiza con respecto á revisión dos documentos, os cales se acharon nunha oficina que pertenceu a Biden entre a súa época como vicepresidente e a súa campaña presidencial de 2020.
