Biden anuncia en Kíiv que enviará máis armamento a Ucraína, incluído algún "que non se subministrou antes"

A poucos días do primeiro aniversario da invasión rusa a Ucraína, o 24 de febreiro, o presidente dos Estados Unidos (EUA), Joe Biden, desprazouse a segunda feira nunha visita fóra de axenda a Kíiv, a capital ucraína, onde ratificou que desde o primeiro momento Washington se comprometeu a ser o seu “maior socio neste conflito durante todo o tempo que fixese falta”. Na viaxe, da que foi notificada Rusia “para evitar unha situación de conflito”, sinalou o conselleiro de Seguridade Nacional dos EUA Jake Sullivan, Biden fixo público un novo paquete de axuda militar a Kíiv de 470 millóns de euros, con armas de longo alcance e armamento que “non se subministrou antes” xunta “munición de artillería, sistemas antiblindaxe e radares de vixilancia aérea”, o que se suma aos 47.000 millóns de euros entregados até o de agora en asistencia a Kíiv, apunta AP. Biden reiterou que o presidente ruso, Vladimir Putin, “trabucouse” ao lanzar a invasión, durante unha breve estancia en Ucraína -antes de dirixirse a Polonia- na que comezaron a soar as alarmas antiaéreas. Aínda así, Reuters reportou que non se produciu ningún ataque aéreo dos militares rusos. Pola súa parte, o mandatario ucraíno, Volodimir Zelenski, reivindicou o golpe de Estado no país en 2014, de cariz pro occidental e impulsado pola extrema dereita, e que deu paso á guerra civil no Donbás. Asemade, insistiu en que unha vez finalizada a guerra “non quedarán inimigos” no territorio de Ucraína. A contestación rusa chegou da man da voceira do Ministerio de Asuntos Exteriores, Maria Zajarova, que definiu a visita como unha constatación do actual “proxecto estadounidense”, mais instou a “non esquecer o destino dos proxectos anteriores dos EUA”, como o ex presidente de Xeorxia, Mikhail Saakashvili, que “está a pagar un alto prezo para ser recordado en Occidente”, aseverou, ou o venezolano Juan Guaidó. En todo caso, Al Jazeera corroborou que a visita de Biden a Kíiv “reforza” os argumentos rusos antes do discurso que dará hoxe Putin diante do lexislativo, tras insistir Moscova en “que tiña que ir á guerra porque non podía permitir o nivel de hostilidade que estaba a ver como se acumulaba na súa fronteira coa Organización do Tratado do Atlántico Norte (OTAN)”. Amais, a China respondeu á “profunda preocupación” trasladada por Washington no caso de que proporcionase armamento letal a Rusia, á que despois se sumou o Alto representante para a Política Exterior da Unión Europea (UE), Josep Borrell, que a cualificou como “liña vermella”. A China non acepta "coaccións" O voceiro do Ministerio de Asuntos Exteriores chinés, Wang Wenbin, sostivo que os EUA “non están en posición de facer exixencias”, incidindo en que non aceptan “coaccións ou presións” no que atinxe ás relacións con Moscova. Precisamente onte estaba prevista unha reunión na capital rusa de Wang Yi, responsábel diplomático do Partido Comunista chinés, para abordar unha proposta de paz en Ucraína que cuestionan non poñan en práctica outros países. “Os EUA deberían promover unha solución política en lugar de botar leña ao lume e explotar a oportunidade para obter beneficios”, afirmou Wang. Arredor das entregas de armas, o Servizo de Intelixencia Exterior de Rusia transmitiu que desde finais de 2021 constataron que a OTAN, a alianza militar liderada polos Estados Unidos, entregou a Ucraína case 10.000 mísiles para lanzafoguetes múltiples, 1.170 sistemas de defensa antiaérea, 440 tanques, 1.510 vehículos de combate de infantería, 655 sistemas de artillería, máis de 600.000 mísiles antitanque e 1.206.000 proxectís. A meirande parte “foi destruído polas tropas rusas”, asegurou. Segundo recoñeceu o propio Borrell, Ucraína depende da subministración de armamento, insistindo en que o conflito vai rematar a menos que se acelere a entrega de asistencia militar. Ao tempo, reclamou que se poña en marcha unha economía de guerra nos membros da UE. Con respecto á Conferencia de Seguridade de Múnic, que se desenvolveu a pasada fin de semana, Borrell subliñou que o bloque comunitario ten que facer máis para convencer América Latina, África e Asia de apoiar a UE á hora de aplicar medidas como as sancións contra Moscova, que tres cuartos dos Estados non aceptaron implantar, algo que atribuíu no caso americano a que eses países creen que Occidente apoiou as ditaduras de extrema dereita que sufriron no pasado, recolle The Guardian. Outro dos países cuestionados polos membros da OTAN nas últimas xornadas foi Suráfrica, onde están a decorrer exercicios militares navais conxuntos con Rusia e a China, cos que comparte participación no bloque dos Brics. O presidente do país, Cyril Ramaphosa, culpou os EUA e a alianza militar por provocar Rusia e forzar que este último país se tivera que defender, todo no marco dos lazos históricos entre Pretoria e Moscova polo apoio ruso á fin do apartheid. Aliás, o Kremlin denunciou 680 funcionarios de seguridade ucraínos, incluídos comandantes das Forzas Armadas e altos cargos do Ministerio de Defensa, por crimes de guerra, indicando que utilizaron medios e armamento prohibido durante o conflito, polo que deben responder por “malos tratos á poboación civil”. Moscova subliñou que parte destas armas prohibidas son as bombas de acio. A ese respecto, o ministro de Exteriores ucraíno, Dmitro Kuleba, afirmou que Rusia está a utilizar estas armas, polo que pediu a OTAN bombas de acio e de fósforo, igualmente prohibidas. A pasada fin de semana, foron os EUA os que implicaron Rusia en “crimes contra a humanidade” en Ucraína, aseverando que se trata dun “ataque xeral e sistemático” contra a poboación civil. No plano militar, as tropas rusas anunciaron onte que tomaron o control de Paraskoviivka, na rexión de Donetsk. A localidade, moi perto de Bakhmut, intensifica o intento ruso de cercar a cidade, o epicentro dos combates nas últimas semanas. Relacións moi tensas entre Rusia e Moldova “Queremos recomendar á nosa contra parte moldova ser extremadamente coidadosa”, declarou onte o voceiro do Kremlin, Dmitri Peskov, tras a petición do novo primeiro ministro próximo á UE, Dorin Rechan, de desmilitarizar Transnistria, independente de facto e con presenza militar rusa. Peskov definiu as relacións bilaterais como "extremadamente tensas". O pasado domingo, milleiros de persoas manifestáronse na capital moldova, Chisinau, en contra da presidenta conservadora Maia Sandu, á que responsabilizan da deterioración das condicións de vida no país.

Biden anuncia en Kíiv que enviará máis armamento a Ucraína, incluído algún "que non se subministrou antes"

Illa rexeita ser president cos votos do PP e reduce as opcións para dirixir a Generalitat a Aragonès ou Puigdemont

A ONU estima en 14 anos a limpeza de bombas sen estoupar e cascallos en Gaza, 37 millóns de toneladas

A Xustiza belga cita Von der Leyen e o líder de Pfizer por presunta corrupción na compra de vacinas

A China reclama á OTAN que deixe de "desviar culpas" sobre Ucraína tras acusala de axudar a "inflixir máis morte e destrución en Ucraína"

O encontro da ALBA e a emergência da luta anti-imperialista

A Fiscalía reclama fechar a causa contra a parella de Sánchez por falta de indicios, tras unha denuncia baseada en acusacións de medios conservadores e de ultradereita

A Revolución dos Cravos fai medio século entre celebracións masivas por todo o territorio

Hamás deixará as armas ao crearse un Estado palestino independente e ofrece unha tregua de cinco anos con Israel