O Xapón comezou esta quinta feira a verter ao océano Pacífico máis dun millón de toneladas de auga procedente da planta de enerxía nuclear de Fukushima, segundo recollen medios locais.
O operador da planta, Tokyo Electric Power (TEPCO), anunciou que a descarga comezaría ao redor das 13, hora local (06:00 hora galega). "A bomba de auga de mar ‘A’ activouse", informou TEPCO, confirmando así que a liberación da auga radioactiva estaba en marcha.
A bomba activada encargarase de enviar o primeiro lote de auga tratada, que se atopa diluída desde unha piscina de mestura, a unha piscina secundaria, para logo descargala ao Pacífico a través dun túnel submarino. A auga recóllese e recíclase en parte como auga de refrixeración despois do tratamento, e o resto almacénase nuns 1.000 tanques, que xa están a 98% da súa capacidade.
Espérase que a primeira liberación de 7.800 toneladas de auga tratada dure ao redor duns 17 días. Tanto TEPCO como a axencia de pesca de Xapón dixeron que monitorearán a auga do Pacífico para detectar a presenza de niveis radioactivos. Á súa vez, o Organismo Internacional da Enerxía Atómica (OIEA) destacou que tamén supervisará o proceso, que se espera que demore uns 30 anos en completarse.
Á súa vez, TEPCO explicou que a operación se suspendería inmediatamente no caso de que se detecte algunha anomalía no equipo de descarga ou nos niveis de dilución das augas residuais tratadas. Ademais, mencionou que enviará un barco nas próximas horas para colleitar mostras para monitorear e garantir que as augas radioactivas vertidas cumpran cos estándares de seguridade.
Reaccións ante a medida de Tokio
Pola súa parte, un portavoz da Administración de Seguridade Nuclear de China criticou esta quinta feira o Goberno nipón de ser "extremadamente egoísta e irresponsábel por lanzar pola forza a descarga [de augas residuais radioactivas]". Así mesmo, comentou que esta medida pon por encima "os seus propios intereses egoístas por encima do benestar de toda a humanidade".
A Chancelaría chinesa, a través dun portavoz, expresou a súa "firme oposición e enérxica condena" respecto á medida adoptada por Tokio. O portavoz comentou que a parte xaponesa "non demostrou a lexitimidade da decisión de descargar a auga ao mar", nin a "confiabilidade a longo prazo do dispositivo de purificación de auga contaminada nuclearmente", facendo referencia á "autenticidade e exactitude dos datos" da vertedura.
"O océano é propiedade común de toda a humanidade", salientou o funcionario, agregando que "lanzar pola forza ao océano a auga contaminada de Fukushima é un acto extremadamente egoísta e irresponsábel que ignora os intereses públicos internacionais".
Nunha conferencia de prensa, o primeiro ministro surcoreano, Han Duck-soo, instou as autoridades xaponesas a revelar a información sobre as emisións de augas residuais da central nuclear de Fukushima liberadas ao océano durante os próximos 30 anos.
A central
A planta de Fukushima Daiichi foi destruída en marzo do 2011, despois de que un enorme terremoto de magnitude 9,0 fronte á costa xaponesa xerase un poderoso tsunami que provocou a fusión de tres dos seus reactores.
Segundo o Goberno xaponés, a liberación de auga é segura e conta co aval do OIEA. Nun informe de xuño, o OIEA sinalou que o plan de vertedura cumpría cos estándares internacionais e que o impacto que tería nas persoas e o medio ambiente era "insignificante".
Protestas polos plans de Xapón
Nacións veciñas, como China e Corea do Norte, manifestaron un forte rexeitamento á medida, mentres que cidadáns en Corea do Sur protestaron contra a decisión do organismo de control nuclear da ONU.
