A UE pacta subir a 42,5% a produción de enerxía "verde" tras ceder ante a nuclear francesa

A Unión Europea (UE) confirmou esta segunda feira que elevará o seu obxectivo vinculante de consumo de enerxía renovábel desde a taxa de 32% actual a 42,5% en 2030 despois de ceder ante a posición de 10 Estados liderados por Francia que defendían a importancia da enerxía nuclear na descarbonización da economía. A taxa galega de xeración eléctrica con fontes solar e eólica sextuplica o índice mundial O acordo, que supón o segundo paso na actualización do vixente obxectivo legal de 32%, aséntase sobre unha negociación política fechada en marzo e non é aínda definitivo, pois terá que validalo tamén o Parlamento Europeo, incluídos os últimos retoques introducidos polos Estados. O pacto chega tras meses de discusións con dous bloques: París, por unha parte, reclamando maior recoñecemento á enerxía nuclear, co apoio dunha decena de Estados membro como Finlandia, Eslovenia ou Romanía; e Berlín, por outro, tentando afastar a enerxía atómica da lexislación sobre enerxía renovábel, con Estados como o español ou o luxemburgués detrás. O bloque anti-nuclear, o perdedor das negociacións desta segunda feira, non quería que se considerase "verde" o hidróxeno producido a partir de enerxía atómica, senón reservar esa categoría só ao que resulte de electrólise con fontes de xeración renovábel, como a enerxía solar ou a eólica. Para lograr o acordo, Francia aceptou un baremo máis ambicioso (45 no canto de 40%, dos que 42,5% son obrigatorios e 2,5% de carácter orientador) mais obtiña a cambio unha declaración da Comisión Europea subliñando a importancia da enerxía nuclear na descarbonización e unha derrogación para a súa industria do amoníaco, un compromiso que para Alemaña "non é bonito, pero é asumíbel". O texto aprobado considera “apropiado incrementar o obxectivo de enerxía renovábel da UE até 42,5% para acelerar de forma significativa o actual ritmo de despregue" desta enerxía. Alén diso, na formulación clave para Francia, o acordo estabelece que “os Estados membro deberían poder combinar o uso de fontes de enerxía non fósil [a palabra “nuclear” non se menciona] e fueles renovábeis de orixe non biolóxica [como o hidróxeno] no contexto das súas circunstancias estatais específicas e o seu mix enerxético”, abrindo a porta á xeración de hidróxeno rosa (a partir da nuclear), como defendía a delegación gala. Con respecto ao cambio no amoníaco, trátase dun sector esencial na produción de fertilizantes agrícolas que depende da queima de gas e onde resultaría moi caro adaptar a produción ao hidróxeno verde, polo que "caso por caso" validaranse outros esforzos de descarbonización, é dicir, o uso de enerxía atómica, como tamén defendía Francia. 46,2% do consumo galego en 2020 foi de renovábeis A pesar de que o conxunto da UE tan só chega actualmente a unha taxa de 22% do seu consumo enerxético a través de enerxías renovábeis, este non é o caso da Galiza, pois xa no 2020 46,2% da enerxía empregada no país proviña de fontes renovábeis, segundo o Balance Enerxético da Galiza, 2020, do Instituto Enerxético da Galiza (Inega). A Galiza xa cumpre co obxectivo de consumo renovábel que a Unión Europea marca para o ano 2030 Desta maneira, constátase que a Galiza cumpre, xa desde o pasado ano 2020, co novo obxectivo de consumo de enerxías renovábeis que se marca a Unión Europea (UE) para 2030 que foi aprobado esta segunda feira en Luxemburgo despois das concesións á enerxía nuclear para superar o veto de Francia e outros 10 Estados. A UE pon o foco nas rexións con "potencial renovábel", como é o caso da Galiza A UE pon o foco nas rexións con "potencial renovábel". Así, chama a aumentar a instalación deste tipo de enerxía e as facilidades para a súa autorización aínda en casos, como o galego, nos que xa se cumpran os obxectivos na actualidade. "Os procedementos de autorización [de enerxía renovábel] serán máis fáciles e máis rápidos baixo a nova lei", sinala a Comisión. Tanto é así que, segundo o secretario de Estado alemán de Economía e Acción Climática, Sven Giegold, para alcanzar o obxectivo de cara a 2030 que agora deberá ratificar o Parlamento Europeo, os Estados no seu conxunto "deberán instalar de media o equivalente a 17 campos de fútbol de paneis fotovoltaicos ao día, 16 aeroxeradores en terra e outros catro marítimos". Un esforzo que poderá recaer sobre as rexións con "potencia renovábel" como a Galiza. Sen acordo para reformar o mercado enerxético da UE Os ministros de Enerxía da UE fracasaron esta segunda feira en Luxemburgo no intento de chegar un acordo para que a reforma do mercado eléctrico incentive os contratos a longo prazo con xeradores de enerxías renovábeis e nucleares despois de que Alemaña e Luxemburgo rexeitasen abrir o financiamento de contratos por diferenza a plantas nucleares xa existentes por considerar que beneficiaría en exceso a Francia. O sector enerxético pide máis tempo para cumprir os requirimentos ambientais para os proxectos renovábeis Aínda que os ministros si chegaron a un acordo sobre o texto da directiva de protección do consumidor e prezos durante unha crise enerxética, non o lograron sobre o regulamento de mecanismos de capacidade dos contratos por diferenza, o principal piar da proposta de Bruxelas para revisar o deseño do mercado eléctrico da UE. Polonia pretendía estender os subsidios ao carbón até 2028 Outro dos puntos que suscitou máis controversia no debate e que propiciou que finalmente non se puidera chegar a un acordo foi unha proposta da presidencia sueca do Consello que incluía a petición de Polonia para ampliar os subsidios ás instalacións existentes para as centrais térmicas de carbón tres anos máis do xa estabelecido: de 2025 a 2028. Desta forma, o deseño do mercado eléctrico aínda non ten data de aprobación. Teresa Ribera (Estado español) "A directiva das renovábeis estaba fechada desde hai tres meses, e creo que deberiamos aplicar como boa práctica respectar os acordos alcanzados e non reabrir de novo estes asuntos”, dixo a vicepresidenta terceira do Estado español, Teresa Ribera. “Non é a maneira na que cremos que se deba seguir traballando, xa o vimos cos motores”, agregou en referencia ao bloqueo alemán a comezos de ano ao acordo para acabar coa venda de vehículos novos de combustión en 2035. Agnès Pannier-Runacher (Estado francés) Francia amosou a súa satisfacción ante un acordo que “corresponde ás expectativas” de recoñecer a enerxía nuclear como parte integral da descarbonización da enerxía da UE, dixo a ministra gala de Transición Enerxética, Agnès Pannier-Runacher. “Estamos bastante satisfeitos. Francia ten unha posición moi ambiciosa en renovábeis, mais queriamos asegurarnos de que as solucións non fósiles fosen recoñecidas e tamén algunhas cuestións específicas do amoníaco”, resumiu. Ebba Busch (Estado sueco) "Podería haber unha forma de impulsar unha maioría [para a reforma do mercado enerxético], mais a min interésame contar co maior número posíbel de Estados e iso redunda no interese de toda a UE", afirmou a ministra de Enerxía de Suecia -Estado que ostenta a Presidencia do Consello-, Ebba Busch. Desta forma, a responsabilidade de conducir as negociacións en pos dun futuro acordo recaerá sobre a presidencia española do Consello Europeo no segundo semestre do presente ano.