Véndense como galegos produtos do sector primario que proceden de fóra

A Federación Rural Galega (Fruga), o Sindicato Labrego Galego (SLG) e Unións Agrarias (UUAA) coinciden na necesidade de defender a produción galega fronte a aquelas mercadorías que, dentro ou fóra da lei, chegan ás persoas usuarias emulando ser de orixe galega sen que isto sexa realidade. Neste sentido, os tres sindicatos agrarios reclaman un maior control por parte das administracións sobre este tipo de prácticas, así como un mellor regulamento da etiquetaxe que evite as confusións sobre a orixe das mercadorías. Un 'mercado negro' do leite O coordinador xeral da Fruga, Manuel da Cal, en conversa con Nós Diario, indica que os sectores galegos máis afectados pola invasión de mercadorías procedentes de terceiros territorios intentando emular unha procedencia galega son o dos produtos cárnicos e o dos lácteos. A Fruga acusa a industria de incumprir a norma nos contratos co sector lácteo "Leva entrando leite de fóra durante moitos anos, tanto de Francia como de Portugal, e tamén hai leite galego que emigra e cisternas que van a Portugal e volven sen descargarse, hai un mercado negro do leite", afirma. As carnes e os lácteos son os produtos máis expostos á fraude na procedencia "Tamén chega carne de animais de fóra da Galiza que se sacrifican aquí e que despois aparecen como procedentes do país polo simple feito de teren sido abatidos nun matadoiro galego, mais o problema é que non temos unha información cuantitativa do que significa isto", prosegue o representante da Fruga. "Existen denuncias por parte do sector do vacún galego de produtos que aparecen cun rótulo no etiquetado que pode levar a engano, aparece a palabra Galiza cando o que están indicando é que foron sacrificados na Galiza, e iso resáltase por riba da procedencia desa carne, téñense dado casos dese estilo, de rotular maliciosamente para dar a entender que a procedencia e a orixe de determinado produto é galega, cando en realidade non o é", explica Da Cal ao respecto. 'Mel da UE e de fóra da UE' Isabel Vilalba, secretaria xeral do SLG, sinala a Nós Diario que "se un produto ten unha etiquetaxe que non procede estamos falando dunha fraude, entón as persoas que teñen un coñecemento preciso de que iso é así, entendo que deberían denuncialo, e isto tamén interpela a Administración pública". Isabel Vilalba: "Hai que acabar co abuso das grandes industrias" "Eu, de forma particular, non teño constancia de que isto sexa así, porque se non xa o teríamos denunciado incluso xudicialmente, porque a etiquetaxe non pode ser nese sentido unha fraude", explica a sindicalista. Porén, afirma, "é certo que hai cousas que nos parecen que favorecen ou nos protexen pouco deste tipo de fraude, temos feito unha campaña forte, por exemplo no mel, para que o etiquetado sexa claro, porque non é que poña 'Mel de Galicia' cando non o é, mais si poñen cousas confusas como 'Mel da Unión Europea e de fóra da Unión Europea', nós sempre estivemos en contra deste tipo de etiquetaxes". "Apostamos por un tipo de etiquetaxe concisa onde poña con claridade a orixe sen ningún tipo de ambigüidade e que non teñan códigos que as persoas consumidoras non somos capaces tampouco de detectar. Temos corroborada esta forma de querer enganar", sinala Vilalba. "Hai matadoiros galegos que nos consta que traen animais doutros lugares e empresas lácteas que sabemos que están traendo produto de fóra, e a Consellaría ten que facer un labor moi importante de vixilancia e de transparencia para saber exactamente que mercadorías entran e que garantías hai de que non haxa fraude", demanda. "Non hai claridade nin transparencia, temos sospeitas cando vemos que chegan cisternas de leite ou camións de queixo que chegan de Francia ou de Portugal, necesitamos garantías plenas para protexer consumidoras e produtoras, sabemos que hai matadoiros da Galiza que certifican como boi e vaca da Galiza animais que traen doutras procedencias", denuncia Vilalba. Tamén nos parece escandaloso que haxa empresas que operan na Galiza e que perciben importantes cantidades de diñeiro das axudas públicas que non sexan transparentes e que estean tendo a práctica de ameazar produtores con baixadas de prezo", conclúe a representante do SLG. Becerros que tan só son sacrificados na Galiza En declaracións a Nós Diario, o secretario xeral de UUAA, Roberto García, explica que "non hai información suficiente no etiquetado dos produtos, e é escandaloso que se substitúa a orixe estatal pola da Unión Europea no rotulado para aproveitar que o leite é máis barato nalgunhas rexións comunitarias". UUAA denuncia o uso de leite portugués como galego "No queixo emprégase a fraude de facer o procesado aquí escondendo a orixe da materia prima. Noutros sectores podemos ver unha situación que non é tanto de fraude senón dunha información pouco visíbel, que é a confusión entre o que é 'Tenreira Galega' e o que é carne ou becerro sacrificado na Galiza", explica o representante de UUAA. "Emprégase de forma basta unha información pouco elaborada para xogar coa dúbida no consumidor. As empresas son conscientes de que ninguén no supermercado se pon a mirar toda a trazabilidade e ler toda a letra pequena, que cada vez é máis difícil entender", afirma. Produtores exixen que a importación cumpra coas normas requiridas na Unión Europea Ademais, engade, "en case todos os produtos que proveñen de acordos comerciais con terceiros Estados, case nunca se identifica de forma evidente a orixe, como pasar coas patacas de Exipto ou coa carne de Mercosur". Manuel da Cal (Federación Rural Galega) Manuel da Cal, da Fruga, opina que os produtos de fóra da Unión Europea que entren no mercado comunitario teñen que reunir as mesmas condicións que os producidos aquí con respecto "ás condicións hixiénico-sanitarias, ao uso de fitosanitarios e antibióticos, porque de non ser así poderían entrar en competencia con custos máis baixos". Uns custos, di, que "xa se dan de por si debido a custos laborais menores". Por iso, respecto a un potencial acordo con Mercosur, entende que se debería asegurar o cumprimento destas condicións impostas aos produtores comunitarios, así como uns mínimos estándares sociais e laborais. Isabel Vilalba (Sindicato Labrego Galego) Isabel Vilalba, do SLG, denuncia que "hai unha constante das grandes corporacións europeas, que é o uso da agricultura como moeda de cambio". Por iso, sospeita que nun potencial acordo con Mercosur, "multinacionais que teñen grandes intereses en América Latina para facerse con negocios como a telefonía ou as infraestruturas, cheguen a acordos para que empresas de alí poidan comercializar aquí produtos gandeiros ou agrícolas". A globalización da distribución dos alimentos, di Vilalba, é "catastrófica" tanto a nivel ambiental como para os pequenos produtores que fican sen as terras, destinadas a cultivos de grande extensión neses Estados. Roberto García (Unións Agrarias) Roberto García, de UUAA, reivindica "cláusulas espello" para os produtos de terceiros Estados co obxectivo de que teñan "as mesmas exixencias medioambientais, sociais, laborais e de controis que temos aquí". Ao respecto, sinala, "non podemos competir con Estados nos que non hai condicións laborais mínimas ou que empregan abonos e fitosanitarios que aquí están prohibidos". Sobre esta cuestión, sinala que "é bo que o consumidor da Unión Europea exixa uns estándares, mais entón tamén hai exixilos aos produtos de fóra". Por iso, García espera que as "cláusulas espello" formen parte dun potencial acordo co bloque de Estados que pertencen a Mercosur.