A fenda salarial entre Galiza e o estado español non mingua. O soldo medio dun asalariado galego foi o ano pasado de 1.769 euros (un 0,5% menos que en 2013), unha cantidade que fica por baixo da media española (1.991): 223 euros mensuais menos. En doce pagas ao ano, case 2.700 euros menos que cobra un asalariado galego que un español. Son dados do INE e do IGE que tamén sitúan a Galiza como o cuarto territorio do Estado pola cola en canto a soldo medio. En 2013 eramos o quinto. En 2014 só superamos a Valencia, Canarias e Extremadura.
A fenda salarial aínda se fai máis grande de compararmos con territorios como Euskadi (624 euros por baixo ao mes), Nafarroa (590 euros menos), 236 menos que un asalariado de Asturies, 600 menos que un de Madrid e 311 menos que un de Catalunya, entre outros exemplos.
En Galiza, ademais, ese salario medio caeu un 0,5% en 2014 en comparación co de 2013, un descenso maior que o rexistrado no Estado español, onde foi do 0,2%. Por sectores, os mellores salarios no país están na industria, por riba da construción ou de servizos.
