Mocidade e formación STEM: unha garantía

As perspectivas de creación de emprego relacionado coa transición enerxética son moi positivas. Os documentos oficiais como o denominado Plan Nacional Integrado de Enerxía e Clima –PNIEC– publicado polo Ministerio de Transición Ecolóxica recollen un incremento anual neto que iría aumentando entre os 250.000 previstos para este ano e os 348.000 postos de traballo creados até 2030 no Estado. Por tipo de investimento, as enerxías renovables están chamadas a xerar entre 100.000 e 135.000 empregos por ano en todo o Estado, seguidas polos investimentos en aforro e eficiencia enerxética, que achegarían entre 50.000 e 100.000 novos postos de traballo por ano. O efecto positivo no emprego por ramas de actividade, segundo o PNIEC, afectaría sobre todo ao comercio e reparación, á industria manufactureira e a construción, con incrementos anuais duns 50.000 postos de traballo para cada unha destas tres actividades. Por sectores, o máis beneficiado é o dos servizos, con impactos que absorben máis de 70% do total dos empregos xerados, seguidos pola industria (15%) e a construción (10%). Son datos que se ofrecen sempre agregados, a nivel de todo o Estado, non sendo posíbel atopar súa tradución a nivel galego. En todo caso, pódese partir dunha simplificación. Se tomamos como referencia o peso galego no PIB estatal (5%) ou a participación na transformación de enerxía no Estado (10%), poderíanse agardar incrementos entre os 15.000 e os 30.000 postos de traballo galegos creados anualmente grazas á transición enerxética. Creación de emprego Os datos recentes de creación de emprego no pasado ano 2023 en Galiza amosan un crecemento singularmente relevante de máis de 34.000 persoas, dato que case triplica os crecementos nos dous anos poscovid. Se a esta tendencia lle sumamos que os datos de poboación parada en Galiza baixou un 50% nos últimos dez anos, resultando unha cifra actual de persoas próxima ás 120.000, poderíase debullar un escenario bastante optimista en termos de emprego. Desde 2020 hai máis persoas traballando maiores de 45 anos que menores desta idade Porén é preciso poñer todos os medios para facilitar a cobertura dos postos de traballo que a transición enerxética xere no noso país, cualificados e incluso de elevada cualificación. As empresas do sector da enerxía están demandando todo tipo de perfís, para os que a formación profesional dual está sendo unha boa ferramenta. Este tipo de formación ofrece ao alumnado (uns 2.000 este curso) a posibilidade de formarse tanto no centro de estudos coma na empresa que demanda este tipo de profesionais, cun elemento diferencial a valorar: o período de formación na empresa é retribuído e, en moitos casos, o alumnado pasa a ser contratado na mesma empresa onde se formou. De forma complementaria, as universidades galegas están a ver como o alumnado en formación en educación superior en perfís STEM (siglas anglosaxoas da formación en ciencia, tecnoloxía, enxeñería e matemáticas), atopa traballo en moitos casos xa nos últimos anos de formación universitaria. Pese a isto, a realidade fala de que hai postos a cubrir, hai necesidade de contratación, mais non se atopan os suficientes profesionais para cubrilas. Ante esta situación as empresas, nalgúns casos, vense obrigadas a traer traballadores que están a traballar fóra do Estado para atender as súas necesidades empresariais. Formación Profesional O alumnado galego de ciclos de FP elevouse este curso a máis de 57.000 –un 15% máis que hai dez anos–, mentres que as facultades e escolas do sistema universitario galego (SUG) están acollendo a preto de 50.000 estudantes –un 33% menos que hai dez anos–. Trátase dunha oferta ampla de formación de calidade para os distintos perfís profesionais e carreiras e itinerarios laborais que as persoas mozas desexen desenvolver no país. Hai e vai haber traballo, particularmente no sector enerxético. A transición enerxética dinamizará o emprego e activará a economía e, con isto, a tan necesaria natalidade. Precisámolo. Porque os datos galegos son demoledores: desde 2020 hai máis persoas traballando maiores de 45 anos que menores desta idade, e na actualidade o indicador de relevo xeracional indicaba que por cada 167 persoas que deixaban de esta en activo, había tan solo 100 en idade de traballar. Galiza está chamada a especializarse en actividades e profesións de futuro, baseadas na sustentabilidade, no uso eficiente dos recursos, na creación de valor e na soberanía (alimentar, enerxética e dos recursos). A formación profesional e universitaria STEM: unha garantía de calidade para que a nosa mocidade acade un futuro exitoso, e que sexa aquí.