Segundo datos do Observatorio da Vivenda os prezos do aluguer incrementáronse en 5% entre finais de 2020 e este verán de 2022. Nas sete cidades galegas, este aumento chega a 5,7%, pois os alugueres xa presentan unha media de 500 euros, 33% máis desde 2015. Segundo indican os datos do Observatorio, a cidade galega máis encarecida nos últimos anos é Pontevedra, porén os seus prezos aínda se sitúan por debaixo dos da Coruña e Vigo, as cidades máis caras para vivir do país cuns alugueres que rondan os 550 euros mensuais.
Este aumento de prezos débese á escasa oferta de pisos nas cidades galegas fronte a unha demanda que vai en aumento segundo o Observatorio. Ademais, a busca de vivendas nas zonas máis céntricas estase a dificultar dado o incremento dos pisos turísticos, que se triplicou nos últimos anos até seren rexistrados legalmente 14.753 na Galiza. A cidade que máis experimenta esta crecente conversión de vivendas en pisos turísticos é Santiago de Compostela, que xa conta cuns 700 inmóbeis declarados para o turismo, mentres que só hai 160 para o aluguer tradicional, segundo a Federación Galega de Empresas Inmobiliarias.
Impacto do turismo
Jackson Renner Rodrigues, investigador do Departamento de Organización de Empresas e Comercialización da Universidade de Santiago, explica para Nós Diario que “a suba dos alugueres impide que as persoas residentes en cidades como a de Santiago de Compostela poidan seguir vivindo nelas”. O profesor pon o exemplo do estudantado universitario cuxa presenza era maioritaria e agora non atopa inmóbel para o curso académico pola suba de prezos do aluguer que, calcula, puido chegar a duplicarse nalgúns casos desde 2020.
Renner advirte da necesidade de concienciar a cidadanía do impacto do turismo, pois está a provocar que a veciñanza deba marchar a vilas dos arredores pola falta de pisos nas principais urbes. Ademais, segundo indica, o tipo de turismo que promove a Xunta da Galiza, como o do Camiño de Santiago, provoca que a modelo de cidade mude en función dos intereses dos turistas e non das persoas residentes.
Problemas para o estudantado universitario
O inminente comezo de setembro marca o inicio dun novo curso no que a comunidade universitaria regresa ás súas cidades de estudo. Porén, o estudantado universitario é un dos grupos máis prexudicados pola suba dos alugueres, pois a escasa oferta incrementou o prezo dos pisos, segundo o Observatorio, en 20% nestes últimos cinco anos, a duración habitual da etapa universitaria.
Andrea Leis, universitaria que estuda en Pontevedra, explica a Nós Diario que xa resulta habitual “citar as persoas interesadas nun piso para visitalo en grupo e normalmente a persoa que primeiro contactou ten máis dereito a decidir se o quere ou non”. Segundo a súa experiencia “os pisos en Pontevedra voan” e engade que ten vivido situacións nas que as inmobiliarias lle dan o piso á persoa que o pode pagar antes. Leis tamén reflexiona para Nós Diario arredor da suba de prezos dos alugueres: “A calidade dos pisos segue igual ou peor porque a maioría dos e das caseiras non invisten en manter a vivenda en bo estado, pero si lle soben o prezo”.
O estudantado universitario non consegue acceder aos mesmos pisos que outros grupos sociais, tanto inmobiliarias como particulares prefiren rexeitar a mocidade e buscar inquilinos cunha maior estabilidade económica. Isto provoca que a xuventude viva en inmóbeis de peor calidade e con desperfectos, indica Leis. Ademais, sinala que “a maioría se aproveitan de que somos estudantes, saben que non temos capacidade para queixarmos ou unha certa lexitimidade como si teñen outros grupos, por exemplo as familias”.
