O alcalde de Santiago de Compostela, Xosé Sánchez Bugallo, avanzou esta sexta feira que a capital galega permitirá compaxinar o uso de vivendas que estean alugadas a maior parte do ano como turísticas só durante xullo e agosto.
A proposta inclúese na modificación do Plan Xeral que será levada a debate no pleno extraordinario do próximo 8 de setembro. Con esta nova normativa, Sánchez Bugallo sinalou que pretende "ordenar e equilibrar" as condicións dos pisos turísticos de Compostela.
"Non pode haber 1.000 pisos en alugueiro turístico e 30 para estudantes, familias e profesionais", aseverou o primeiro edil. "A modificación do plan permitirá compatibilizar, por exemplo, que durante dez meses poidan ser para estudantes e nos dous meses estivais sexan de alugueiro turístico", explicou o rexedor.
Bugallo culpa a Xunta da "situación irregular" de parte dos pisos turísticos
Por outra parte, Bugallo culpou o Goberno galego da "situación irregular" na que se atopan na actualidade algúns destes aloxamentos vacacionais.
"Gran parte dos pisos que funcionan como turísticos non están regulados; houbo unha confusión coa inscrición no Rexistro da Xunta como Concesión de Autorización", explicou o alcalde compostelán.
"Os propietarios inscribiron o seu piso no Rexistro e entenderon que iso equivalía a unha licenza, mais a Xunta non as pode dar porque non é a súa competencia", aclarou.
Por iso, acusa a Xunta "non verificar" se as propiedades inscritas no seu rexistro contaban con licenza do Concello, cando esta administración "ten a obriga" de garantilo.
