O conselleiro de Medio Rural recoñece que “hai risco de desaparición do sector gandeiro” galego

Por mor da situación que atravesa e que se ve agravada pola guerra en Ucraína.

Explotación de vacún en extensivo. (Foto: Europa Press) #gando #gandaría #vacún #fruga #galiza #ue
photo_camera Explotación de vacún en extensivo. (Foto: Europa Press)

O conselleiro de Medio Rural, José González, considera que existe "risco" de que desapareza o sector gandeiro na Galiza, dada a delicada situación á que se enfronta, sobre todo coas derivadas da guerra en Ucraína.

Nunha entrevista concedida a Cadea Ser Galicia, e recollida por Europa  Press, González sinalou que a situación é "moi preocupante", sobre todo se se ten en conta o incremento dos custos de produción en meses previos. Segundo explicou, e en base a un informe realizado polo departamento, no ámbito gandeiro prodúcese un fenómeno de venda a perdas de forma xeneralizada.

Unha situación que empeora co conflito ucraíno, "unha situación moi delicada motivada polo incremento no custo do gran do penso dos animais". "Parte principal dos custos de produción é a alimentación, en torno a 60%. Por exemplo, en 2020, a tonelada de millo estaba en 180 euros, e esta semana pasada nos 420 euros", explicou o conselleiro. Sobre isto, destacou que a Galiza importa tres millóns de toneladas ao ano, "moito de Ucraína".

A este respecto, González apuntou que ademais da poíbel falta de cereais, tamén podería haber desabastecemento pola "imposibilidade dos gandeiros para pagalos". "E aí si podemos actuar", remarcou.

Perdas

E é que aínda que indicou que todo o sector gandeiro atravesa unha situación "complicada" -vacún de carne, porcino e de todo o sector das aves-, o peor parado é o vacún de leite. No informe ao que se refire o conselleiro, cunha mostra de 112 explotacións, rexístrase un incremento en 2021 de catro céntimos no custo de produción, de 36 a 40 céntimos. "Como consecuencia da crise de Ucraína, pode darse un incremento de entre cinco e sete céntimos do que falamos en 2021", advertiu.

Fronte a isto, asegurou, é "momento de xuntarse todos; non é unha solución das Comunidades autónomas, é de España". González considera que o Goberno estatal debe liderar unha proposta dentro da Unión Europea para "salvar un sector estratéxico para o rural como é a gandería ante o risco de desaparición se non se toman medidas".

"Ante situacións extraordinarias, hai que tomar medidas extraordinarias", defendeu González, que insistiu en que o Goberno español lidere un grande acordo entre industria, distribución e gandeiros para "poder subir os prezos que lles están chegando aos nosos gandeiros ".

Respecto a os contratos a perdas, o titular de Medio Rural aseverou que están "dispostos" a "comprobar" eses contratos de venda a perdas, pero pediu "axuda e financiamento" porque ata o ano pasado "era competencia estatal".

Preguntado pola seguridade mostrada respecto a a delicada situación do sector, González apuntou que "se acolle ás palabras de operadores como Coren ou do propio presidente da asociación de gandeiros porcinos". "Que sector se pode manter moito tempo perdendo diñeiro?", preguntouse o conselleiro.

José González tamén abordou a reunión no Ministerio de Agricultura dos vindeiros dias, onde avanzou que se vai a ter que abordar "abrir a importación de cereais doutros países, concretamente de Arxentina ou Estados Unidos"; o acordo entre industria e distribución; e se Bruxelas debe empezar a pensar nalgunha solución extraordinaria baseada na PAC".

O agro pide axudas e frear a especulación cos cereais para evitar o feche de granxas

A Federación Rural Galega (Fruga) alerta de que os continuos aumentos dos custes de produción, que atribúen a unha "operación especulativa",  están a pór "ao bordo da desaparición" unha parte importante das explotacións galegas.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios