260 concellos galegos contan con centrais de xeración eléctrica de orixe renovábel

Eólica Así Non mobilizarase a vindeira segunda feira, 20 de novembro, ás 16.30 horas diante do Parlamento da Galiza para protestar contra o actual modelo eólico do Goberno galego. A concentración convocada onte pola plataforma, que agrupa máis de 200 colectivos de toda Galiza, ten como obxectivo expresar o rexeitamento á nova lexislación eólica recollida na Lei de medidas fiscais e administrativas da Xunta da Galiza dos orzamentos de 2024, popularmente coñecida como Lei de acompañamento dos orzamentos. Precisamente, nesa xornada someterase a debate a proposta lexislativa. A nova normativa propón declarar "de interese público superior" a "planificación, construción e explotación dos parques eólicos de competencia autonómica, así como das súas infraestruturas de evacuación". Esta declaración "inclúe os seus procedementos de autorización, construción e posta en funcionamento". Na mesma orientación, “a declaración do interese público superior da planificación, construción e explotación dos parques eólicos […] atendendo ás finalidades nas que se basea, implica a presunción de que as indicadas actividades responden a ese interese público superior e contribúen á saúde e seguridade públicas”. A proposta formulada pola Xunta da Galiza é rexeitada por unha parte das organizacións políticas, sindicais, ecoloxistas e por múltiples colectivos que desde o ámbito local están enfrontando diversos proxectos de renovábeis. Neste sentido, Eólica Así Non entende que a Lei de medidas fiscais e administrativas da Xunta da Galiza dos orzamentos de 2024, “na que se declaran os proxectos eólicos de interese público superior”, e mais o anteproxecto de Lei de promoción dos beneficios sociais e económicos dos proxectos que utilizan os recursos naturais da Galiza “supoñen a entrega definitiva do país ao capital privado”. A resposta ás sentenzas do TSXG A modificación lexislativa obxecto de disputa foi formulada polo Goberno galego como unha resposta ás diversas sentenzas do Tribunal Superior de Xustiza da Galiza (TSXG) que paralizaron e anularon sete proxectos eólicos e cuxa doutrina abriu a porta a deixar na mesma situación perto de 100 instalacións de renovábeis en proxecto. A medida, que segundo o presidente galego, Alfonso Rueda, buscaba ofrecer seguridade xurídica ao sector, foi saudada positivamente pola Mesa para o Desenvolvemento Renovábel e Industrial da Galiza, entidade que naceu tras coñecérense as sentenzas de suspensións dos parques eólicos ditaminadas polo Alto Tribunal galego. O TSXG entendeu nesas resolucións que o Goberno galego incumpriu a normativa estatal e comunitaria á hora de outorgar a licenza a estes parques ao non pór a disposición da cidadanía os informes sectoriais preceptivos no trámite de información pública. A este respecto, sinalou, en repetidos autos e sentenzas que tanto a lei estatal como comunitaria recollen a necesidade de emitir informes sectoriais antes de someter os proxectos e os estudos ambientais ao trámite de información conxunto. Porén, a práctica totalidade das instalacións eólicas autorizadas pola Xunta da Galiza nos tres últimos anos non dispoñen desa documentación nese momento do procedemento, tal e como obrigan as directivas comunitarias. Galiza é unha das grandes produtoras de electricidade do Estado español, até o punto de superar a xeración de orixe renovábel as necesidades de consumo de empresas e persoas residentes no país. Así, a potencia eólica instalada no territorio galego sitúase en 3.907 megawatts (MW), distribuída en 183 parques emprazados ao longo de 125 concellos galegos. Neste momento, só sete comarcas carecen destas instalacións —Baixo Miño, Compostela, Terra de Lemos, Valdeorras, Quiroga, Viana e O Morrazo—, porén, en todas elas, agás no Morrazo, proxéctanse iniciativas neste ámbito. 83% de concellos, con centrais enerxéticas O Instituto Enerxético da Galiza (Inega), organismo público dependente da Xunta da Galiza, sinala sobre 2021, último ano con cifras, que 260 concellos galegos, isto é 83,1% do total, contan con centrais de produción eléctrica, destacando dentro destas as instalacións eólicas e hidráulicas. Nesta liña, resulta salientábel o caso da comarca da Terra Chá, onde están emprazados 820 dos 4.018 aeroxeradores operativos na Galiza, cos 381 muíños instalados no concello de Muras e cos 200 de Abadín. As enerxéticas tramitan a instalación de 17.550 MW eólicos na Galiza, o que implicaría quintuplicar a potencia eólica en funcionamento. Suman esa cifra 7.200 MW de 275 parques que serán emprazados en 189 localidades galegas; os 4.023 MW en aprobación por parte do Goberno estatal, que ten competencias para autorizar todos aqueles complexos eólicos cunha potencia superior a 50 MW, e os 6.327 MW das solicitudes rexistradas polas compañías enerxéticas para desenvolver a eólica mariña nas augas galegas, cunha capacidade de xeración que duplica a prevista polo Ministerio de Transición Ecolóxica (Miteco) para todo o Estado. Gómez Besteiro defende facer da Galiza un “territorio enerxético 100% A convocatoria da mobilización de Eólica Así Non fíxose pública onte a través dun comunicado, mesma xornada en que o candidato do PSdeG á Presidencia da Xunta da Galiza, José Ramón Gómez Besteiro, mantivo unha reunión coa Mesa para o Desenvolvemento Renovábel e Industrial da Galiza, unha entidade impulsada desde a patronal eólica e integrado pola Asociación Eólica da Galiza (EGA), a Asociación Galega do Hidróxeno, a Asociación de Industrias do Metal e Tecnoloxías Asociadas da Galiza, o Clúster de Enerxías Renovábeis da Galiza, a Confederación de Empresarios da Galiza, a Federación Galega da Construción, así como os sindicatos CCOO e UXT. A Mesa para o Desenvolvemento Renovábel e Industrial da Galiza e José Ramón Gómez Besteiro coincidiron na necesidade de potenciar e acelerar o proceso de implantación de renovábeis no país. A este respecto, Besteiro presentou a súa formación como “o promotor da enerxía renovábel”, asegurando que “nós si temos claro que a xeración de enerxía é moi importante no proceso de reindustrialización da Galiza, sobre todo con enerxías, para convertelo nun territorio enerxético”. O candidato do PSdeG explicou que “o Partido Socialista sempre defendeu as enerxías verdes, a súa necesidade para a industrialización e un marco de seguridade xurídica para a súa implantación, fronte a un posicionamento do PP de paralización de constante de sector e de freo as enerxías renovábeis”. Neste punto, avanzou a súa vontade de formular un pacto social con diversos axentes para "facer da Galiza un territorio enerxético 100%".