Medra a produción galega en ecolóxico, que xa factura máis de 112 millóns de euros ao ano

A s cifras da produción ecolóxica da Galiza medran cada ano, segundo os últimos datos do Consello Regulador da Agricultura Ecolóxica de Galiza (Craega), actualmente as vendas de produtos galegos en ecolóxico aproxímanse aos 113 millóns de euros anuais. No país, hai perto de 46.000 hectáreas certificadas que producen en ecolóxico e perto de 1.200 produtoras e produtores e máis de 360 elaboradoras e elaboradores destes produtos. Juan Ramón Díaz, responsábel de Promoción do Craega, explicou a Nós Diario que “na última década a agricultura ecolóxica da Galiza tivo unha evolución de crecemento constante, en maior ou menor medida, pero sempre en crecemento. É unha curva ascendente da que pode presumir o sector”. O certo é que os datos avalan o potencial ecolóxico do país, desde ano 2012 as vendas dos produtos ecolóxicos galegos medraron 385%, o número de produtoras e produtores aumentou 133% e o de elaboradores e elaboradoras medrou 214%. Do total das vendas de produtos ecolóxicos galegos, a produción animal representa 55,93% até superar os 63 millóns de euros anuais; no caso da produción vexetal é de máis de 29 millóns de euros (25,72%) e os produtos acuícolas e algas son 18,34% do total, alcanzando ao ano perto de 231 millóns de euros en vendas. En resposta a Nós Diario, Juan Ramón Díaz sinala que a materia pendente da Galiza é o consumo destes produtos. “É unha dinámica ligada ás sociedades avanzadas, cada día máis preocupadas pola alimentación. No caso galego, somos recoñecidos como unha sociedade produtora de alimentos de gran calidade”. Pero o certo é que “actualmente o punto máis débil é o consumo, facer a compra hoxe é 9% máis caro que hai un ano, mentres os salarios seguen iguais, e así como o sector ecolóxico soubo afrontar outras crises, esta lle está a afectar como ao resto de sectores da economía”. A produción ecolóxica de orixe animal segue a ser a de maior volume. Leite, carne e ovos son os alimentos ecolóxicos estrela do país. No caso do mar destacan desde o Craega que “temos a honra de ser os líderes en produción acuícola ecolóxica no Estado, representamos 95% deste sector” e Juan Ramón Díaz asegura que “somos unha potencia, cos mexillóns e algas como os nosos máximos expoñentes”. No caso da produción vexetal “xa non temos tanto de que presumir”, desde o consello regulador explican que “segue a ser unha tarefa pendente o aumento de produtores, porque actualmente a demanda é superior á oferta e debemos incidir e animar a futuras produtoras e produtores que se sumen ao sistema de produción ecolóxica”. Grelos e leitugas, entre os produtos máis prexudicados polos cambios na meteoroloxía Bágoas da Ría Juan Carlos Juncal é a terceira xeración de bateeiros da súa familia na ría de Arousa, xunto coa súa muller tamén de tradición no sector, puxeron en marcha a empresa Dimesalnés e a marca ecolóxica Bágoas da Ría. No Craega hai 215 bateas certificadas que producen unha media de 70 toneladas de mexillón cada unha, dependendo da campaña a cifra alcanza os 250 millóns de quilos deste molusco. Comercializan o produto en fresco e elaborado e recoñece a Nós Diario que producir en ecolóxico “encarece”. Bágoas da Ría elabora cos mexillóns conservas, croquetas e mesmo hamburguesas. “Pelexamos moito”, salienta Juan Carlos Juncal, que explica que nunha soa das súas croquetas en convencional o custo é de 20 céntimos, “mentres que en ecolóxico o custo acaba en 38 ou en 40 céntimos”. Este bateeiro e empresario, presidente da Confraría de San Amaro desde hai 18 anos e vogal do Craega, defende o futuro en ecolóxico no seu sector malia lamentar que “aínda non haxa esa cultura de consumo responsábel e de calidade” que si teñen noutros países coma Alemaña. O déficit comercial da 'despensa galega' alcanza xa os 1,5 millóns de euros diarios: "Precisamos recuperar a produción propia" Mariñeiras Daveiga Outro referente no sector son as galletas mariñeiras Daveiga. Tres irmáns Lamazares quixeron voltar á súa terra cun proxecto de economía social que hoxe é xa un referente na produción galega. Daveiga, afincada en Chantada e con orixes en Rodeiro, produce ao día 6.000 quilos das súas “mariñeiras”. Comezaron a súa andaina empresarial en 2005 e dous anos despois lanzaron unha liña ecolóxica que hoxe representa xa 10% da súa produción. Xosé Lois Lamazares explica a Nós Diario que a produción en ecolóxico de Daveiga “aumenta paralelamente” co resto da empresa, “hai un aumento desa liña ano a ano pero ao sector cústalle arrancar”, de feito identifica coma os maiores consumidores destes produtos a zona de Levante, Barcelona, Madrid e Euskadi. “O mercado galego e o portugués compórtanse igual neste senso e hai potencial pero non están consolidados”. Daveiga factura ao ano coa súa Sociedade Laboral máis de 6 millóns de euros, a liña ecolóxica segue adiante con potencial de futuro pensando tamén nos mercados europeos que acaban de abrir, pero o esforzo é importante porque producir en ecolóxico ten uns custos 15% superiores á produción convencional. O investimento está feito, desde 2005 Daveiga pasou de tres socios e seis traballadores a novas instalacións, 75 empregos estábeis e un grupo de 10 estacionais e 55 socios e sociais. As “mariñeiras” venden seis referencias en ecolóxico. Produtores ecolóxicos acusan a Xunta de "boicotear" o sector Eólica en terra e mar Emprendedores en ecolóxico recoñecen a necesidade de aproveitar o potencial galego na produción de enerxías limpas, pero “se se fai como até agora, de costas aos mariñeiros, o beneficio será só para alguén que non é de aquí”, afirma Juan Carlos Juncal. Na súa experiencia no sector, explica que en Bélxica xa se puxo en marcha a eólica mariña “e os mariñeiros tiveron que retirarse da zona”. Por iso empraza as autoridades a “facelo organizado, sen rebentar a vida aos traballadores e ás traballadoras do mar e non pensando nas grandes multinacionais”. No rural a fotografía é similar, Xosé Lois Lamazares critica que os proxectos de novos parques eólicos “non están a pensar na dinamización das zonas onde se implantan”. Afirma que “hai que facer compatíbeis as actividades, respectar o impacto ambiental e priorizar o desenvolvemento rural”.