O xa ex mandatario federativo, Luis Rubiales, dixo adeus a un cargo que ocupaba desde 2018 logo de presentar unha dimisión que anunciou a través da súa conta en X case entrada a madrugada da noite do domingo á segunda feira. "Tras a veloz suspensión realizada pola FIFA, máis o resto de procedementos [xudiciais] abertos contra a miña persoa, é evidente que non volverei ao meu cargo; insistir en quedarme non contribuirá a nada positivo, nin á Federación nin ao Fútbol español", afirmou.
Non obstante, nun texto no que non menciona en ningún momento nin a futbolista Jenni Hermoso nin o bico sen consentimento que lle deu en Sydney (Australia) durante a celebración do recentemente concluído Mundial de fútbol o 20 de agosto, Rubiales non desaproveitou a oportunidade para vitimizarse sinalando que existen "poderes fácticos" que "impedirían" o seu regreso ao cargo que ostentaba até que a FIFA decidiu suspendelo durante 90 días o 26 de agosto.
"Debo mirar cara adiante, mirar ao futuro. Agora hai algo que me ocupa con firmeza. Teño fe na verdade e vou facer todo canto estea na miña man para que prevaleza. As miñas fillas, a miña familia, a xente que me quere sufriu os efectos dunha persecución desmedida, así como de moitas falsidades", queixábase o xa ex presidente da RFEF, cargo que será ocupado por Pedro Rocha de forma interina até que se designe o seu sucesor definitivo.
O seu nome sairá dunhas eleccións que se desenvolverán no primeiro semestre de 2024 e nas que o voto recaerá sobre as mesmas persoas que aplaudiron case unanimemente Rubiales na Asemblea Extraordinaria do 25 de agosto na que, fóra de si, repetía mentres golpeaba o estrado a frase "non vou dimitir!". Entre elas, por suposto, o responsábel da territorial Galega, Rafael Louzán, que aínda non se pronunciou sobre a dimisión do seu homólogo estatal.
Fin a cinco anos de polémicas
O adeus de Luis Rubiales ao cargo de presidente da Real Federación Española de Fútbol despois de cinco anos pon fin a unha etapa marcada pola polémica, seguindo así unha tradición de escándalos que rodea o cargo desde hai décadas, pois o seu predecesor, Ángel María Villar (1988-2017), foi destituído polo Tribunal Supremo pola súa implicación na Operación Soule.
Non levaba nin un mes no cargo cando, nunha manobra interpretada como unha forma de dicir "aquí estou eu", destituíu o seleccionador estatal, Julen Lopetegui, a falta de dous días para o comezo do Mundial.
Despois chegou o contrato, comisión de 24 millóns de euros incluída, para levar a Supercopa a Arabia Saudita; os continuos enfrontamentos con David Aganzo —o seu sucesor á fronte da AFE, que dirixiu entre 2010 e 2017, tempo no que foi acusado de pagar a súa casa con fondos do sindicato— e co outro 'home forte' do fútbol español, o presidente da Liga, Javier Tebas; espionaxe, orxías e outra infinidade de pequenas polémicas que o acompañaron até o seu último día no posto.
