Antía Jácome e Pablo Graña fixeron historia ao conseguir a medalla de ouro no C2 200 mixto dos Xogos Europeos de Cracovia, que se celebran en Polonia.
A canoa guiada pola pontevedresa e o cangués saíu forte desde o comezo e mantivo ritmo até o final.
Jácome e Graña deixaron os seus rivais a máis dun segundo de diferenza, unha enorme distancia nunha proba de apenas douscentos metros. Os galegos demostraron o seu espléndido estado de forma arrollando todos os rivais.
O tándem galego dominou a carreira superando por máis dun segundo aos anfitrións polacos, que quedaron coa prata. O bronce foi para Alemaña, que rozou a segunda posición.
Esta é a segunda medalla para os dous canoístas galegos. Jácome logrou a prata xunto a María Corbera no C2 500 metros (distancia que forma parte do calendario olímpico de París 2024, no que está centrando o seu adestramento) e Graña conseguiu o bronce no C1 200 metros.
Noutra destacada participación galega nesta xornada dos Xogos Europeos, o padeeiro pontevedrés Adrián Sieiro, do Náutico O Muíño de Ribadumia, finalizou en sexta posición na final do C1 500, proba que gañou o checo Martin Fuks.