A convulsa situación no seo do RC Deportivo da Coruña continúa poucas xornadas despois perder un frenético partido ante o Castellón que relegaba os branquiazuis a continuar unha temporada máis na terceira división (denominada 1ª RFEF) do fútbol estatal.
Ante esta situación o club comunicou a última hora desta cuarta feira a renuncia de todos os membros do Consello de Administración así como do adestrador, Rubén de la Barrera.
“O presidente e todos os membros do Consello de Administración do RC Deportivo decidiron renunciar na tarde de hoxe. A decisión foi tomada para favorecer o proceso de reestruturación do club de cara á nova temporada”, comeza o comunicado da entidade coruñesa.
Para alén diso, comunicaron a súa intención de convocar unha Xunta de Accionistas: “Na súa última reunión, o Consello decidiu convocar unha Xunta de Accionistas para o día 17 de xullo na cal se nomeará un novo Consello. Á fronte do Club estará David Villasuso Castaño, como apoderado xeral”.
Área deportiva
“A reestruturación incluirá a área deportiva. O actual adestrador, Rubén de la Barrera, non dirixirá ao RC Deportivo a próxima temporada”, comunican desdes o Deportivo.
Ademais, aproveitaron para desmentir que o equipo “vaia a incorporar ningún dos teóricos nomes que saíron repetidamente nos medios de comunicación como candidatos a dirixir a área deportiva. Nos próximos días tomarase a decisión definitiva”.
“O RC Deportivo agradece a dedicación ao Club tanto do Consello como do adestrador Rubén de la Barrera”, finaliza o comunicado.
Haberá que agardar para ver que depara o futuro inmediato aos branquiazuis que xa miran de cara á próxima temporada en busca do ansiado ascenso á segunda división do fútbol estatal.