Máis de 250 atletas competirán este sábado nas pistas universitarias de Santiago nunha nova edición do Campionato Xunta da Galiza da categoría Sub-20. Estarán loitando polos podios e tamén por acadar as mínimas para poder estar no estatal da categoría que decorrerá en Soria (Castela e León) os días 22 e 23 de xullo.
Na relación de participantes, destaca a presenza da internacional e plusmarquista galega dos 100 metros, Ainhoa Repáraz (Val Miñor), que correrá os 100 e os 200 metros. Tamén estará Alba Cuns (Playas de Castelló), outro dos referentes no concurso de triplo salto que parte como favorita.
De igual modo, en peso e disco estará a subcampioa de España do ano pasado, Xiana Lago (Ría Ferrol).
No concurso de martelo salientar a presenza de Blanca Pereira (Ourense Atletismo) xunto ás especialistas en combinadas, e tamén medallistas, Lucía Sánchez (Atlética Lucense) e Carlota Salgado (Celta).
Varias medallas en pista cuberta tamén poden ter posibilidades. É o caso de Isabel Caeiro (Ximnástica de Pontevedra), nos 3.000 metros; Emma Sihuang Pérez (Atlética Lucense), en altura; Fernando Vallines (Madeiras Barcia Lourenzá) en peso; e Nicolás Ortega (Atletismo Sada), en disco.
Con opcións para o campionato estatal están tamén Xoel Otero (Mazí), sobre o triplo, lonxitude e os 110 valos; David Vicente (Playas de Castelló), nos 110 valos; e Pedro Vázquez (Celta), nos 1.500 metros.
Por último non se debe perder de vista medallistas que fixeron un bo papel no último galego absoluto: David García (Atletismo Santiago), en altura; Paula Noya (Atlética A Silva), nos 400 metros; María Ouréns (Atletismo Sada), nos 400 valos; e as atletas Beatríz López (Riazor A Coruña) e Nadia Lía (Val Miñor) nos 800 metros.