martes 07/12/21

Balaídos homenaxeará ao 'gato de Catoira' ante o Barça

Sergio Álvarez realizará o saque de honra minutos antes do partido deste sábado diante o FC Barcelona. O porteiro celeste tivera unha homenaxe no mes de maio mais sen público como consecuencia da pandemia. 
Sergio Álvarez na homenaxe que se lle fixo en maio (RC Celta).
Sergio Álvarez na homenaxe que se lle fixo en maio (Foto: RC Celta).

A pandemia da Covid-19 privou a Sergio Álvarez, máis coñecido como "o gato de Catoira", dunha merecida homenaxe a través do agarimo da afección celeste despois da súa despedida. Este sábado, minutos antes do partido ante o FC Barcelona, o celtismo terá a oportunidade de mostrarlle o seu respecto e admiración cando realice o saque de honra. 

Sergio retirouse a finais da pasada tempada por mor dunha lesión e o club organizou no estadio de Balaídos un emotivo acto de despedida no que participou todo o cadro de xogadores e corpo técnico, acompañados de directivos, ex compañeiros  e familiares.

Escola de porteiras e porteiros

A despedida do xogador non significou que se alonxara do club. Coa súa marcha do primeiro equipo naceu a Escola de Porteiros Fundación Celta Sergio Álvarez. Era unha demanda da maioría da afección celeste que tivo a súa inauguración o pasado 20 de setembro.

O primeiro día, Sergio agasallou con luvas  asinadas por el para que as rapazas e os rapaces poideran adestrar. A escola está pensada para nenas e nenos que naceran entre os anos 2007 e 2015, ambos inclusive. 

Descontos para o encontro do sábado

Despois do valioso empate conseguido en Vallecas, o RC Celta buscará este sábado (Balaídos, 16.15 horas) ante o FC Barcelona unha vitoria de prestixio que ratifique a mellora do seu xogo e a súa competitividade. O equipo debe recuperar ademais a solidez de outrora en casa, para o que necesita o alento dunha afección que desde o comezo do campionato apoiou con enerxía aos celestes. 

Desde o club anunciaron que as e os afeccionados poderán adquirir os billetes para este encontro na páxina oficial do club con prezos que oscilan entre os 40 e os 100 euros.

A información galega está na túa man!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

Ademais, o RC Celta, pon a disposición de cada abonado unha entrada cun 15% (até esgotar existencias) con prezos que van dos 34 até os 85 euros. 

Para este importante partido o Celta poderá contar co dianteiro Santi Mina, unha vez comprobado que non sofre danos estructurais, segundo desvela a ecografía que lle realizaron nas últimas horas os servizos médicos do RC Celta para comprobar a gravidade da lesión.

Balaídos homenaxeará ao 'gato de Catoira' ante o Barça
comentarios