CULTURA

Un teatro para María Casares

Unha iniciativa busca rebautizar o Teatro Colón da Coruña co nome da actriz

Un teatro para María Casares

María Casares é, sen dúbida, unha das grandes actrices do século XX, unha muller cuxa biografía se elevou á categoría do mito. Agora, unha iniciativa pide cambiar a denominación do Teatro Colón para que ostente o seu nome, como homenaxe dunha cidade e dun país que sempre tivo presentes. 
O Teatro Colón pertence á Deputación da Coruña pero xestiónase en convenio co Concello da cidade.
photo_camera O Teatro Colón pertence á Deputación da Coruña pero xestiónase en convenio co Concello da cidade.

"Eu nacín aquí", escribiu María Casares subliñando a súa orixe galega, o seu sentimento de pertenza a un país do que foi traxicamente separada. No libro de memorias que publicou, Residente privilexiada, a grande actriz relata como ese afecto pola terra foise desenvolvendo no exilio, como se fose Rilke proclamando que a verdadeira patria é a infancia. O ano do centenario do seu nacemento, Casares está volvendo á Galiza, a Coruña que a viu nacer, a través dos actos que conmemoran a data. Mais o regreso podería ser máis duradeiro se, como queren numerosos colectivos da cidade, o Teatro Colón pasase a recibir o nome da artista.

O pasado novembro, Miguel Anxo Fernán Vello publicou un artigo no que suxería que esa sería a mellor homenaxe que se lle podería facer a Casares no seu nacemento –"O nome da cidade da Coruña, con dous teatros a levaren nome de muller (Rosalía de Castro e María Casares), brillaría aínda máis, sen dúbida, entre nós e no mundo", escribía- e a plataforma de persoas traballadoras no sector cultural Unímonos ou Afundímonos recolleu a luva daquel reto para iniciar unha campaña que solicita o cambio de nome do teatro. 

A iniciativa xa recibiu o apoio de numerosas asociacións: a Academia Galega do Audiovisual, a Asociación de Actores e Actrices de Galiza, a Asociación de Escritores e Escritoras en Lingua Galega, Musicas ao Vivo, a Asociación Sindical Galega de Guionistas, a Asociación Galega de Produtoras Independentes, a Asociación Cultural Alexandre Bóveda, A Asociación Cultural O Facho, o Ateneo Republicano, a Fundación Uxío Novoneyra, ou a Comisión Pola Recuperación da Memoria Histórica da Coruña, entre outras moitas, manifestáronse a favor do cambio de nome para o teatro coruñés. 

Carlos Ares, da plataforma Unímonos ou Afundímonos, en conversa con Nós Diario, entende que "a cidade da Coruña débelle unha homenaxe como esta a María Casares. Ela sempre se mostrou orgullosa de ser galega, mais falou sobre todo da súa infancia na Coruña, cara a que sempre manifestou un vínculo moi especial. Sempre falou dela con moito cariño, e non hai máis que ler as súas memorias para comprobalo". 

Casares foi unha das grandes actrices do século XX e, segundo Ares, "calquera cidade do mundo estaría disposta a bautizar un teatro co seu nome". Non obstante, os méritos da actriz non se limitan ao campo artístico. "Sempre loitou polos dereitos dos traballadores do mundo do espectáculo, por dignificar o rol das mulleres e mesmo colaborou coa Resistencia francesa durante a ocupación nazi. Darlle o seu nome ao teatro constituiría un acto cívico de primeira orde". 

No ano do centenario 

Xosé Barato, presidente da Asociación de Actores e Actrices de Galiza (AAAG), responsábel de organizar os grandes premios do teatro galego, que levan o nome da actriz, considera que "ligar o nome de María Casares a un dos grandes teatros da cidade que a viu nacer sería un gran recoñecemento e facelo neste ano do centenario -no que tantas actos se anuncian, veremos con que contido-  tería un simbolismo aínda maior". Barato considera, ademais, que o nome de Colón "non ten ningún vínculo especial coa Coruña; que se lle chamase así responde a esa moda que se deu nunha determinada época de bautizar os teatros co nome doutros de gran prestixio, neste caso o Teatro Colón de Bos Aires". 

A AAAG leva difundindo a obra e a figura de María Casares desde hai anos, facendo coincidir a gala de entrega dos seus premios con diversas actividades que inclúen a proxección das súas películas no CGAI, roteiros por lugares da cidade que tiveron algún significado especial na súa biografía, ou coloquios e conferencias diferentes aspectos da súa traxectoria. "Este ano, algunhas desas actividades serán organizadas pola Consellaría", explica Barato, "aínda que non sabemos en que consiste exactamente o programa. De feito, desde a Agadic [Axencia Galega das Industrias Culturais] anunciaron que os Premios María Casares ían ter unha edición especial, sen consultar connosco que somos os organizadores. Resulta polo menos curioso". 

O proceso de cambio 

O Teatro Colón pertence á Deputación provincial da Coruña pero xestiónase en convenio co Concello. Esta vindeira quinta feira, presentarase unha proposta para levar a cabo o cambio no Pleno do Concello e, de aprobarse, a petición terá que ser levada á Deputación. "Mantivemos conversas cos grupos e tempos plena confianza en que o cambio se producirá por unanimidade", declara Carlos Ares. "María Casares é unha figura moi querida por toda a cidadanía, máis alá de ideoloxías". 

comentarios