Após o vinte aniversario do seu pasamento, a compañía Condetrespés en coprodución co Centro Dramático Galego interpretará Rastros de Roberto Vidal Bolaño.
A adaptación será dirixida por Lois Blanco Araúxo. A peza teatral estréase a sexta feira 4 e o sábado 5 de marzo, ambas as representacións ás 20.30h no Teatro Principal de Compostela.
O dramaturgo, figura fulcral da cultura e o teatro galego, foi homenaxeado co Día das Letras Galegas en 2013. É por iso que, desde sempre, Lois Blanco Araúxo, admirador da obra do compostelán, decidiu levar a cabo a adaptación teatral da súa obra Rastros.
Nela, a pretensión do autor é trasladar a obra ambientada a finais do século XX, na época actual. En palabras do director: “Pór a Vidal Bolaño no noso século, é por en valor seguramente ao noso mellor dramaturgo. Rastros, se o escribise un autor inglés, sería un dos clásicos do teatro contemporáneo”.
A obra xirará por toda a Galiza
A estrea na capital galega dará paso a unha xira por toda a Galiza. Rastros deixará a súa pegada en Vimianzo, Carballo, Cee, Narón, Ourense, O Barco de Valdeorras, Viveiro, A Estrada e Redondela, finalizando o percorrido o 27 de maio no Teatro Rosalía da Coruña.
O elenco que representará a obra está formado por catro actores e actrices galegas formadas na Escola Superior de Arte Dramática de Vigo: Antea Rodríguez, Muriel Pernas, Pablo Carrera e Mateo Franco.
Diego Valeiras será o director do espazo escénico, mentres que Dani Juncal estará a cargo do deseño de iluminación e Javier Gey Fungueiriño do son.