Chegamos ao final desta experiencia de música para o confinamento coa actriz Cris Iglesias como convidada. Con ela facemos un percorrido dunha semana, a modo de diario, cunha canción para cada día na casa para quedarnos co importante.
Entre os seus últimos traballos figuran a serie Auga Seca, unha coproducción galego-portuguesa, a curta 16 de decembro, de Álvaro Gago, e mais o filme Eroski Paraíso, de Jorge Coira, baseada na peza teatral da compañía Chévere.
SEGUNDA FEIRA
"You gotta Be. Porque todo é cuestión de actitude e este tema noventero de Des'ree é un bo motivo para comezar a semana"
TERZA FEIRA
"Guadi Galego é unha sorte que temos na Galiza. A pesar da dureza dos tempos, estamos Cheas de vida! Sempre!"
CUARTA FEIRA
"Varios dos meus amigos, compañeiros de vida musical durante anos, emigraron a Holanda. Alí formaron o grupo Mamihlapinatapai (si, podes volver ler o nome) esencia galega polo mundo, amigos loitadores, eles teñen Galiza moi presente, aquí Chove sempre e nós botámolos de menos"
QUINTA FEIRA
"Dá igual que se achegue a finde… Eu Non quito o chándal neste confinamento, e ti seguro que tampouco. Novedades Carminha arranxa calquer día e non só por seren boa xente"
SEXTA FEIRA
"Desde a túa casa ou onde queira que esteas, non esquezas que nós temos o poder. People have the power de Patti Smith, unha das miñas grandes referentes"
SÁBADO
"Non pode faltar Freedom de George Michael, porque si, gústanme moito os clásicos 90´s e desde que vin o grande espectáculo Shock de Andrés Lima o ano pasado, este tema cobrou ainda máis importancia no meu día a día para darme moita enerxía. Penso nos meus compañeiros de Fariña, o espectáculo, cando nos dispoñemos a saír a escena e sempre esbozo un sorriso"
DOMINGO
"Uxía e Narf levan anos acompañándome nesas noites de sono difíciles. Porque quen puidera agora marchar a Zemambiquo por un tempo, Narf. A súa nana non entende de idades e a poesía feita música cura sempre"
E aquí a listaxe para escoitar as cancións: