—En que consiste "Na Utopía" e como xorde a idea?
'Na Utopía' é unha plataforma web de obradoiros online. Isto é, un sitio web onde se poden aprender todo tipo de temáticas explicadas en galego en formato vídeo.
O proxecto xorde para dar saída a moitas inquedanzas e loitas importantes para min a través da miña profesión de deseñadora gráfica e as ferramentas que aprendín dela. Así, puiden crear un proxecto no cal podo traballar da man con persoas ás que admiro e darlles un espazo na rede en que poidamos coñecelas un pouco máis e aprender con elas. Todo isto, aínda por riba, en galego dun xeito consciente. Cremos que fai falta ver proxectos de todos os tipos en galego e case máis aínda na internet. Nunca son os suficientes, e estamos encantadas de achegar algo na loita.
Só se precisa unha conta e conexión a internet
—Como funciona un obradoiro online 'Na Utopía'?
Non son aulas en directo, gravámolos coas persoas que o dan, preparando previamente a estrutura, o contido e o guión. Logo pasan un proceso de edición onde tamén engadimos algunha información máis en forma de esquemas ou infografías, para axudar tamén dun xeito visual a entender mellor aínda a información. Logo, subímolos á web, onde se poden mercar e acceder a eles en calquera momento. Só é preciso unha conta e unha conexión a internet. E son teus para sempre, non tes que volver pagar en ningún momento.
—Que persoas hai implicadas e que cursos ofertan neste momento?
Neste momento contamos con cinco obradoiros: 'Técnica básica de pandeireta', da man do músico Gabi Reboredo; 'Introdución á gravación e mestura de cancións' co tamén músico Nando Pérez; 'Introdución á fotografía dixital' coa creadora audiovisual Claudia Berro, compoñente da produtora Mala Herba; 'Técnica básica do labor de gancho ou crochet' con Sara Couselo, a quen podedes atopar no TikTok; e 'Do papel á voz', un obradoiro para se enfrontar a falar en público, da man da recitadora Nuria Vil, tamén autora do recente libro 'Simún'. Á parte disto, estamos xa a traballar en novos obradoiros para que a publicación de contido sexa constante, xa que a cantidade de persoas con propostas interesantes é abraiante. Tentaremos que o catálogo vaia sendo variado.
A creación en galego na rede creceu moito e adoramos ver que isto é así
—É case inevitábel pensar na pandemia e no confinamento ao falar de algo como obradoiros online.
Durante o confinamento todo o online creceu moitísimo, pero sitios web deste tipo xa os había tamén antes disto e sempre me pareceron un xeito moi bo de complementar outro tipo de formación ou de descubrir ou ampliar intereses. Creo que serviu para que a xente que non estaba tan interesada antes neste tipo de posibilidades puidesen velas con outros ollos e darlles unha oportunidade.
—Nestes anos vimos unha efervescencia de creatividade na nosa lingua que sobordaba os eidos clásicos e se orientaba cara a rede. Como ve este momento, a que pensa que pode deberse?
É verdade que a creación en galego na rede creceu moito e adoramos ver que isto é así. Non sei se hai unha única razón para que isto pasara, pero creo que quizais iniciativas como Youtubeiras, o éxito do #DígochoEu ou, desde hai xa máis tempo, o consultorio lingüístico @emgalego no Twitter, entre outras, tiveron moito que ver. Canto máis vamos vendo todo tipo de contido en galego, máis persoas entenden que poden facelo así, na súa lingua, e non teñen por que mudala para a rede. Oxalá a tendencia continúe e cada vez máis persoas se sintan cómodas creando na súa lingua e se animen a facelo.
