As asociacións Maruxío e Casal de Creación retoman para os días 11 e 12 de xuño na Estrada, as Xornadas de Arte, Creatividade e Ruralidades que se adiaron o pasado mes de abril como consecuencia do mal tempo.
A proposta destas entidades contará co mesmo emprazamento da anterior convocatoria, a Casa de Rebolos, en Terreboredo, e o mesmo obxectivo: dar a coñecer as propostas innovadoras e apegadas ao rural que ollan cara unha visión máis contemporánea do territorio.
Desde a Asociación Maruxío, María explica a Nós Diario que con estas actividades procuran “mostrar a vida cotiá que vivimos aquí, con moitos proxectos que deixan atrás os tópicos que se repiten sobre o rural”. Recoñece que a visión que predomina é que “vivimos da agricultura ou da gandería” cando nós “temos unha mirada máis ampla, con moitas iniciativas funcionando”.
Programa de actividades
As actividades comezarán o sábado 11 de xuño ás 11. 30 horas coa presentación da exposición Galiza profunda e a actuación posterior de Serodio e Uxío ás 13 horas. Seguirá un obradoiro de arte rupestre a cargo de Fran Ameixeiras (13.30 horas) para nenas e nenos.
Pola tarde, ás 17 horas, proxectaranse curtametraxes de videopoesía de Theresa Lousame e ás 18 horas realizarase unha mesa redonda co tema A batalla cultural dana as artistas: posicionamento das artistas e a súa creación, na que participarán Vanesa, de Casal de Creación, Cabalinho do Demo e Theresa Lousame, entre outras. A xornada rematará co recital de poemas e cantigas de Iria Medraño González, ás 19.30 horas.
O evento continuará o domingo 12 de xuño ás 12 horas coa proxección do documental Acorda, en colaboración coa Asociación Vagalume e a Deputación de Pontevedra. Seguirá o pase de Festivaliño On The Road e a actuación do Cuarteto Barbude.
Rematarán as xornadas con outra mesa redonda ás 17 horas co tema de Creacións, diverxencias e confluencias: novas formas de construír. Nela participarán os colectivos Anacos creativos, Festival Agrocuir, a Asociación Maruxío, Seres Festival e Mulleres Creando, Creativas galegas, Coliving Anceu e Pura Quiteria.