O Festival de la Luz (Boimorto, comarca de Arzúa), acollerá as actuacións de dez proxectos musicais galegos integrados no programa Sonemerxente. As actuacións programaranse durante o sábado 26 e o domingo 27 de agosto Por él pasarán as bandas e solistas Paraíso Canto, Samudra Trío, Zeltia Irevire, De Ninghures, Adrian Timms, HYDN, Ani Baires, Helena Egea, Law e Mondra.
Estas propostas escollidas para participar na aceleradora de proxectos compartirán cartel con artistas galegos, estatais e internacionais como Viva Suecia, Vicco, Rayden, Heredeiros da Crus, Ladilla Rusa, Roi Méndez, Ona Mafalda, Luar na Lubre ou Reincidentes.
O Escenario Sonemerxente é unha aposta polo talento emerxente galego a través dunha proposta que impulsará o directo e a profesionalización dos proxectos. A aceleradora de proxectos musicais Sonemerxente está a impulsar na actualidade as propostas de dez bandas e artistas que foron seleccionados para participar nesta iniciativa da Xunta de Galicia que xestiona a Fundación Paideia Galiza e que conta co financiamento dos fondos NextGeneration da Unión Europea dentro do Plan de Recuperación, Transformación e Resiliencia.
Impulso en dúas etapas
O conxunto de participantes en Sonemerxente viven unha experiencia de impulso e dinamización estruturada en dúas etapas.
A primeira delas, centrouse en sesións individuais e colectivas de mentorización ao redor de asuntos capitais como son a produción, promoción ou modelo de negocios.
A segunda parte dedícase á participación dos artistas en circuítos de concertos, festivais, encontros con medios e asistencia a mercados profesionais.
No pasado, o Festival da Luz foi criticado por non empregar a lingua de maneira oficial e por non programar grupos ou solistas que se expresasen en galego.
