Tomates vermellos secos e algo máis

—Ensalada de burrata, cóengos, noces e mel Unha ensalada fresca, sinxela e rápida para entrantes ou ceas. Elaboración: Comezamos botando os cóengos nun prato e colocamos a burrata no centro. Facemos un corte en cruz sobre o queixo e botamos as noces sobre a ensalada. Botamos un chisco de mel por enriba e a continuación alfábega sobre a burrata. Rematamos cun chorriño de aceite e servimos. —Estufado de porco Un guiso de carne, dos de toda a vida, dos que fan chup chup coa pota a fogo lento. Elaboración: Comezamos cortando a cebola, o allo e o pemento en brunoise. Pelamos e cortamos o tomate en cadradiños e reservamos todo. Rustrimos a cebola a lume baixo até que estea transparente e engadimos o pemento e o allo. Pasados uns minutos, regamos co vaso de viño e deixamos evaporar o alcohol. Despois diso adicionamos o tomate e as follas de loureiro e mesturamos todo ben. Deixamos cociñar un pouco e engadimos tamén os anacos de carne, que previamente salpimentamos, cociñamos a fogo lento uns 40 minutos remexendo de cando en vez para que non se pegue ao fondo. Cando teñamos a carne a medio pasar engadimos un vasiño de auga, os chícharos e as patacas peladas e cortadas en anacos. Rectificamos o sal e deixamos outros 20 minutos máis ou menos até que se cociñen as patacas. Servimos quentiño. —Crostata de queixo fresco e froitos vermellos Unha versión deste doce italiano, con queixo fresco batido e marmelada. Elaboración: Comezamos facendo a masa. Para iso mesturamos a manteiga a temperatura ambiente co azucre e as améndoas moídas coa axuda dun batedor de globo. Cando estea uniforme, engadimos o ovo e a fariña pouco a pouco até ter unha mestura homoxénea. É unha masa bastante pegañenta, unha vez engadida a fariña, mesturamos cunha lingua pasteleira. Despois de ter a masa preparada, botámola sobre un film transparente, cubrímola con forma de bóla e deixámola repousar na neveira unha hora como mínimo. Podemos facela dun día para o outro se queremos. Para o recheo lavamos un limón e relamos a súa pel, evitando partes brancas para que non amargue demasiado. Escorremos o soro do queixo e mesturamos coa reladura do limón e co azucre. Batemos a marmelada cun batedor para que fique máis líquida e reservamos todo. É unha masa bastante pegañenta e difícil de traballar. Imos sacala da neveira e manipulala o máis rápido posíbel para evitar que se quente e sexa máis difícil manexala. Cun rolete estendémola sobre papel de forno e colocámola sobre o molde. Colocámola ben e prememos nos bordos para retirar a parte sobrante. Retiramos o papel e cos anacos de masa que nos sobren facemos outra boliña e gardámola na neveira. Botamos por enriba da masa o queixo e a continuación a marmelada, esparexéndoas ben para que fiquen uniformes. Estendemos a boliña de masa que nos sobrou e facemos tiras que colocaremos cruzadas sobre a torta. Metemos no forno, que previamente quentamos a 170ºC, deixamos uns 35 minutos até que se doure a masa por enriba. Deixamos arrefriar un chisco antes de desmoldala e gardámola na neveira para servila ben fresquiña.